Masallıda azadlıq mücahidlərinin xatirəsi dərin hüznlə yad edilib
Masallı, 20 yanvar, AZƏRTAC
Masallı şəhərindəki “Qəhrəmanlar parkı”nda 20 Yanvar şəhidlərinin xatirəsinə ucaldılmış abidə kompleksinin önündə anma mərasimi keçirilib.
AZƏRTAC xəbər verir ki, yanvarın 20-də səhər saatlarından başlayaraq minlərlə rayon sakini faciə qurbanlarının xatirəsini böyük ehtiramla yad edib.
Rayonun rəhbər işçiləri, yaşlı nəslin, gənclərin və ictimaiyyətin nümayəndələri abidə kompleksinin önünə gül dəstələri düzərək Azərbaycanın suverenliyi və ərazi bütövlüyü uğrunda şəhid olanların xatirəsini dərin hüznlə anıblar. Burada şəhidlərin ruhuna dualar oxunub.
Mərasimdə çıxış edənlər 25 il əvvəl o ölüm saçan Yanvar günlərində qızıl qanları ilə xalqımızın qəhrəmanlıq tarixinə parlaq səhifələr yazaraq şəhidlik zirvəsinə ucalan istiqlal mücahidlərinin xatirəsinin xalqımız tərəfindən həmişə böyük məhəbbətlə anıldığını vurğulayaraq, bu faciəyə siyasi və hüquqi qiymətin verilməsində ümummilli lider Heydər Əliyevin əvəzsiz xidmətlərindən danışıblar.
Rayonun bədii özfəaliyyət kollektivlərinin ifasında 20 Yanvar faciəsinin dəhşətlərini əks etdirən ədəbi-bədii kompozisiya nümayiş etdirilib.
Bölmənin digər xəbərləri
