MDB-NİN ÜMUMİ AQRAR BAZARI YARADILIR

25.10.2005 [14:43]
Çap et
A⁺ A^-

Romada BMT-nin Ərzaq və Kənd Təsərrüfatı Təşkilatının 60 illik yubileyinə həsr olunmuş tədbirlərdə iştirak edən kənd təsərrüfatı naziri İsmət Abasov Krım Muxtar Respublikasının Sudak şəhərinə gəlmişdir.

Nazirliyin mətbuat xidmətindən AZƏRTAC-a bildirmişlər ki, o, oktyabrın 25-28-də MDB-nin burada keçiriləcək Aqrar-Sənaye Kompleksi Məsələləri üzrə Hökumətlərarası Şurasının növbəti iclasında iştirak edəcəkdir.

Tədbirdə MDB-nin ümumi aqrar bazarının yaradılması ilə bağlı, 2010-cu ilə qədər MDB-nin taxıl bazarının yaradılması və fəaliyyətinin əsas istiqamətləri, “Yaşıl dəhliz” dövlətlərarası əmtəəkeçirici sistemi əsasında meyvə-tərəvəz məhsullarının və kartof bazarı dövriyyəsinin təşkili, 2006-2008-ci illərdə MDB dövlətlərinin ümumi aqrar bazarının problemləri üzrə elmi-texniki əməkdaşlıq Proqramının layihəsi, 2010-cu ilə qədər şəkər bazarının yaradılması və fəaliyyəti, MDB dövlətləri arasında aqrar sahədə dövlətlərarası əməkdaşlıq orqanlarının təkmilləşdirilməsi və digər məsələlər müzakirə olunacaqdır.

İsmət Abasov tədbirdə Azərbaycanda aqrar-sənaye məhsullarının istehsalı vəziyyəti və inkişaf istiqamətləri barədə məruzə ilə çıxış edəcəkdir.