MDU-da “Sabahın alimləri” ilə görüş keçirilib
Bakı, 26 yanvar, AZƏRTAC
Mingəçevir Dövlət Universitetində (MDU) Azərbaycan Respublikasının Elm və Təhsil Nazirliyinin və digər müvafiq qurumların təşkilatçılıq etdiyi “Sabahın alimləri” XIII Respublika müsabiqəsində iştirak edəcək Mingəçevir məktəbliləri ilə görüş keçirilib. Müsabiqənin ilkin mərhələsindən keçən Mingəçevirin 9 komandasının üzvləri və onların mentor müəllimləri universitetin bir qrup akademik-inzibati heyət üzvləri ilə bir araya gəliblər. Görüş MDU və Mərkəzi Aran Regional Təhsil İdarəsinin Mingəçevir şəhəri üzrə Təhsil sektorunun birgə təşəbbüsü əsasında keçirilib.
Universitetdən AZƏRTAC-a bildirilib ki, “Sabahın alimləri” müsabiqəsinin final mərhələsinə çıxmaları münasibətilə şagirdləri təbrik edən MDU-nun Elm və innovasiyalar şöbəsinin müdiri, dosent Vüqar Mustafayev, onlara universitet rəhbərliyi adından uğurlar diləyib. O, bu görüşün məqsədinin məktəblilərdə ruh yüksəkliyi yaratmaq və şəhər təhsil ictimaiyyətinin istedadlı gənclərə davamlı dəstəyini hiss etdirmək olduğunu bildirib. V.Mustafayev təhsil sistemində Mingəçevir məktəblilərinin özünəməxsus yerinin olduğunu deyib, onların yaradıcılıq potensialının üzə çıxarılması baxımından bu cür müsabiqələrin önəmindən söhbət açıb və MDU-nun məktəblilərin inkişafı istiqamətində daim dəstək olmağa hazır olduğunu diqqətə çatdırıb. Qeyd edib ki, IX-XI siniflərdə təhsil alan şagirdlərin tədqiqat və araşdırmalara cəlb edilməsi, onların elmi və yaradıcılıq fəaliyyətinin stimullaşdırılması çərçivəsində yeniyetmələr üçün yaradılan şəraitdən faydalanmaq, bu istiqamətdə aktivlik nümayiş etdirmək onların gələcək fəaliyyətlərində özünü müsbət nəticələrlə göstərəcək.
Sonra “GEOLAB” laboratoriyasında sınaq məqsədli təcrübə keçirilib və iştirakçılar nəticələr barədə məlumatlandırılıb.
Məktəblilər müsabiqə üçün hazırladıqları layihələri təqdim ediblər və sonda fikir mübadiləsi aparılıb.
Şagirdlər və onların mentorları göstərilən diqqət və dəstəyə görə minnətdarlıqlarını bildiriblər.
Qeyd edək ki, “Sabahın alimləri” XIII Respublika müsabiqəsi 8 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri) üzrə elmi-tədqiqat işinə meyli olan istedadlı şagirdlərin aşkar olunmasına hədəflənib və sonda yüksək elmi-tədqiqat nəticələri əldə edən Azərbaycan məktəbliləri ABŞ-da keçirilən Beynəlxalq Elm və Mühəndislik Sərgisinə (ISEF) göndəriləcək.
Bölmənin digər xəbərləri
