Media: ABŞ İsrailin münaqişəyə son qoymaq niyyətini İrana çatdırıb
Bakı, 23 iyun, AZƏRTAC
Birləşmiş Ştatlar Yaxın Şərq ölkələrindən İsrailin münaqişəyə tezliklə son qoymağa çalışdığını İrana çatdırmağı xahiş edib.
AZƏRTAC xəbər verir ki, “The Wall Street Journal” qəzetinin yazdığına görə, İsrail İrandakı hədəflərə zərbələr endirməyə davam edir, lakin eyni zamanda müharibəni dayandırmağa çalışır.
Ekspertlərin fikrincə, Tehran hazırda “təhlükəli seçim” qarşısındadır: ya müharibənin genişləndirilməsi riskini gözə alaraq ABŞ-ın hərbi bazalarına cavab zərbəsi endirmək, ya da mümkün güzəştlərlə nüvə danışıqlarına qayıtmaq.
İsrail hakimiyyəti İrandan danışıqlara razılıq verməsini və uranın zənginləşdirilməsini dayandırmasını gözləyir. Lakin Təl-Əviv Tehranın nüvə proqramı üzərində işlərini davam etdirəcəyi təqdirdə İrana yeni zərbələr endirməyə hazırdır.
Xatırladaq ki, iyunun 13-nə keçən gecə İsrail ordusu İrana kütləvi aviazərbələr endirməyə başlayıb. Zərbələr zamanı İranın nüvə obyektləri, generalları, nüvə fizikləri, aviabazaları, hava hücumundan müdafiə sistemləri və ballistik raketləri hədəf alınıb. Tehran isə buna cavab olaraq İsrailin hərbi bazalarına və sənaye obyektlərinə ballistik raket və PUA hücumu həyata keçirib. İyunun 22-nə keçən gecə isə ABŞ bombardmançı təyyarələri İranın nüvə obyektinə zərbələr endirib.
Bölmənin digər xəbərləri
