Media: İran Qətərdəki 6 milyard dollarlıq aktivlərinə hələ də çıxış əldə etməyib
Bakı, 1 iyul, AZƏRTAC
Qətərdə dondurulmuş İran aktivləri ilə bağlı vəziyyət hələ də qeyri-müəyyən olaraq qalır.
AZƏRTAC xəbər verir ki, bu barədə “New York Post” ABŞ rəsmisinə istinadla məlumat yayıb.
Məlumata görə, Qətərdə saxlanılan və ümumi həcmi 6 milyard dollar qiymətləndirilən İran vəsaitləri hələ də Tehranın istifadəsinə verilməyib.
Nəşrə danışan mənbə bildirib ki, “dondurulmuş aktivlər azad edilməyib və İran anlaşma memorandumunun şərtlərinə əməl edənə qədər bu vəsaitlərin sərbəst buraxılması gözlənilmir”.
Onun sözlərinə görə, Tehran vəsaitlərin birdəfəlik köçürülməsində maraqlıdır, lakin Vaşinqton mərhələli yanaşmanı üstün tutur. ABŞ tərəfi bu vəsaitlərin əsasən humanitar təchizatçılar vasitəsilə bölünərək istifadə olunmasını təklif edir.
Xatırladaq ki, İran Prezidenti Məsud Pezeşkian daha əvvəl İran və Qətərin ümumilikdə 12 milyard dollar dəyərində dondurulmuş aktivlərdən 6 milyard dollarının azad edilməsi barədə razılıq əldə etdiyini bildirmişdi. Onun sözlərinə görə, qalan vəsaitlərin də mərhələli şəkildə qaytarılması istiqamətində danışıqlar davam edir.
Bölmənin digər xəbərləri
