Media: Suriya Türkiyədən silah almağı planlaşdırır
Bakı, 20 oktyabr, AZƏRTAC
Suriya Türkiyədən hava hücumundan müdafiə sistemləri də daxil olmaqla, müxtəlif silah sistemləri almağı planlaşdırır.
AZƏRTAC xəbər verir ki, “Yeni Şafak” qəzetinin məlumatına görə, bu silahlar ölkənin “İsrail təhlükəsinə və terrora qarşı müdafiə qabiliyyətinin gücləndirilməsi” məqsədilə alınacaq.
Nəşrin yazdığına görə, Suriyanın müvəqqəti hakimiyyəti Türkiyəyə müraciət edərək hava hücumundan müdafiə sistemləri, zirehli texnika, pilotsuz uçuş aparatları (PUA) və müasir artilleriya sistemlərinin rəsmi şəkildə satışını istəyib. Qeyd olunur ki, bu satış hərbi yardım deyil, məhz rəsmi alqı-satqı çərçivəsində həyata keçiriləcək.
Əsas prioritetlərdən biri Suriyanın şimal hissəsini əhatə edəcək çoxmərhələli hava hücumundan müdafiə sisteminin qurulmasıdır. Ötən həftə Türkiyənin Müdafiə Sənayesi Agentliyinin rəhbəri Haluk Görgün Dəməşqə səfər edib və tərəflər arasında bu mövzu ilə bağlı danışıqlar aparılıb.
Xatırladaq ki, bu ilin iyul ayında Suriyanın Müdafiə Nazirliyinin yüksəkvəzifəli nümayəndə heyəti İstanbulda keçirilən IDEF 2025 müdafiə sənayesi sərgisində iştirak edib.
Bölmənin digər xəbərləri
