Məhəmməd Salah 2018-ci il futbol üzrə dünya çempionatında iştirak edəcəyinə əmindir
Qahirə, 28 may, AZƏRTAC
İngiltərənin "Liverpul" klubunun və Misir yığma komandasının yarımmüdafiəçisi Məhəmməd Salah Çempionlar Liqasının finalında çiynindən aldığı zədədən sonra yenidən yaşıl meydanlara qayıdacağına əmin olduğunu bildirib.
AZƏRTAC xəbər verir ki, bu barədə o, öz "Twitter" hesabında yazaraq qeyd edib ki, bütün çətinliklərə baxmayaraq çempionatda iştirak edəcək, Rusiyada olacaq. Futbolçu etiraf edib ki, o gün çox ağır gecə idi. “Amma mən döyüşçüyəm və bütün çətinliklərə baxmayaraq, əminəm ki, mənimlə fəxr etməyiniz üçün Rusiyada olacağam. Sizin sevgi və dəstəyiniz mənə ehtiyac duyduğum gücü verəcək" - deyə o qeyd edib.
Öncə Misirin idman naziri Xaled Əbd Al-Əziz bildirmişdi ki, Məhəmməd Salahın aldığı zədədən sonra müalicəsi iki həftə çəkəcək.
Qeyd edək ki, misirli futbolçu Çempionlar Liqasının final oyununda İspaniyanın “Real Madrid” yığmasının oyunçusu Serxio Ramosla toqquşmadan sonra çiynindən zədə alıb.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
