Məhkəmə sədri: Ədalət mühakiməsi rəmzləri eksponatlarını 15 ilə yaxın müddət ərzində toplamışam
Bakı, 25 oktyabr, AZƏRTAC
Kolleksiyamda 100-dən çox ölkənin məhkəmə hakimiyyəti ədalət mühakiməsi, prokurorluq, vəkillik, normativ hüquqi aktlara aid rəmzlər toplanıb. Mən bunları uzun illərdir toplayıram və çox şadam ki, onları ictimaiyyətə və maraqlı olan şəxslərə nümayiş etdirə bilirəm.
AZƏRTAC xəbər verir ki, bunu “Avropa Ədalət Mühakiməsi Günü”nə həsr olunan ədalət mühakiməsi rəmzlərinin sərgisində iştirak edən Xətai Rayon Məhkəməsinin sədri Rəşid Rzayev jurnalistlərə müsahibəsində deyib.
“Hesab edirəm ki, bu, hüquq sahəsində çalışan gənclər üçün əhəmiyyətli sərgidir. Çünki kolleksiyada Azərbaycanın hüquq və məhkəmə sisteminə aid çoxlu nadir eksponatlar var. Məsələn, kolleksiyanın eksponatları arasında 1848-ci ilə aid Gəncənin hakimi Ziyadoğlu ilə bağlı sənədlər var. Bundan başqa, 1861-ci ildə Rusiya imperatoru II Aleksandr manifesti ilə Azərbaycanın ərazisində təhkimçilik hüququnun ləğv edilməsinə dair sənəd nümayiş olunur. Həmin manifestə uyğun olaraq kənd hakimi vəzifəsi, kənd starşinası köməkçisi vəzifəsi təsis olunub. Burada üstündə Bakı quberniyasının rəmzləri olan çox nadir, xüsusi nişanlar sərgilənir. Eləcə də kolleksiyada Bakı qazisinin və axundlarının möhürləri var, hansı ki, nikah bağlayanda o möhürü vururdular. Onun üstündə isə ərəb dilində “ailə sevgisi” sözü yazılıb”, - deyə Rəşid Rzayev qeyd edib.
Məhkəmə sədri məlumat verib ki, bundan başqa, kolleksiyada Azərbaycan hüququna aid bir sıra sənədlər, alqı-satqı müqavilələri də yer alıb: “Həmin sənədlər keçmiş vaxtın qanunlarına uyğun olaraq hakimin möhürü ilə təsdiq olunan müqavilələrdir. İndi isə biz bilirik ki, bunları notarius təsdiqləyir. Amma keçmiş zamanlarda onları hakim təsdiq edirdi. Həmin rəmzlər Azərbaycanın hüququnun tarixinin öyrənilməsi baxımından çox böyük əhəmiyyət kəsb edir. Odur ki, bunları toplayıb saxlamaq, gələcəkdə tədqiqat aparmaq və müvafiq ədəbiyyat və məqalələr yazmaq çox vacib məsələdir. Çünki bu bizim gələcək hüquqşünas nəslinin, ümumiyyətlə, Azərbaycanda hüququn inkişafı tarixini öyrənmək üçün önəmlidir. Mən həmin eksponatları 15 ilə yaxın müddət ərzində toplamışam. Ali Məhkəmənin və Vəkillər Kollegiyasının rəhbərliklərinə öz kolleksiyamızı burada nümayiş etdirməyə şərait yaratdıqları üçün minnətdarlığımı bildirirəm”.
Bölmənin digər xəbərləri
