Meksika radiosunun dinləyiciləri münaqişədən sonra Cənubi Qafqazda yaranmış vəziyyət barədə məlumatlandırılıb
Bakı, 26 may, AZƏRTAC
Meksikanın çoxmilyonlu dinləyici kütləsinə malik “Enfoque Noticias” radiosunda Azərbaycanın bu ölkədəki səfiri Məmməd Talıbovun erməni təcavüzünün tarixi, torpaqlarımızın işğaldan azad edilməsi, münaqişə sonrası bölgədəki son durum və bu ərazilərdə ölkəmiz tərəfindən aparılan yenidənqurma işləri barədə tanınmış jurnalist, “CNN”nin ispandilli bölməsinin aparıcısı Mario Qonsalesə müsahibəsi yayımlanıb.
Ölkəmizin Meksikadakı səfirliyindən AZƏRTAC-a bildiriblər ki, müsahibədə 1991-1994-cü illərdə Azərbaycan ərazisinin beşdəbirinin Ermənistan tərəfindən işğal edilməsi, təcavüzkar dövlətin etnik təmizləmə siyasəti və bu ərazilərin demoqrafik tərkibini dəyişmək cəhdləri, bu xüsusda 1 milyona yaxın soydaşımızı məcburi köçkünə çevirməsi, 30 ilə yaxın işğal dövründə ölkəmizin bütün səylərinə baxmayaraq, rəsmi Yerevanın qeyri-konstruktiv mövqeyi səbəbindən bu münaqişənin danışıqları yolu ilə həllinin mümkün olmadığı barədə məlumat verilib.
Bildirilib ki, ötən ilin sentyabr ayında Ermənistan tərəfinin növbəti təxribatı nəticəsində münaqişənin yenidən eskalasiya mərhələsinə keçib, aparılan hərbi əməliyyatların yekununda işğalda altındakı ərazilərimiz azad edilib, Azərbaycan, Ermənistan və Rusiya liderlərinin 10 noyabr tarixli üçtərəfli Bəyanatının tələblərinə görə isə Ermənistan ordusunun bölmələri Azərbaycanın digər torpaqlarında çıxarılıb.
Proqramda hazırda Azərbaycanın başlıca hədəfinin məcburi köçkünlərin evlərinə qayıtmasına şərait yaradılması olduğu deyilib, bu istiqamətdə mövcud maneələr haqqında danışılıb, bu xüsusda 30 ilə yaxın işğal dövründə şəhər və qəsəbələrimizin tamamilə dağıdıldığı, bu səbəbdən həmin ərazilərdə yolların, məktəb, hospital və insanların yaşayışı üçün zəruri olan digər infrastruktur obyektlərinin yenidən inşası üçün ölkəmiz tərəfindən irihəcmli sərmayə qoyuluşu həyata keçirildiyi söylənilib.
Eyni zamanda, azərbaycanlı məcburi köçkünlərin geri qayıdışı və bölgənin yenidən qurulmasını ləngidən digər amilin bu ərazilərin Ermənistan tərəfindən kütləvi şəkildə minalanması olduğu, hərbi əməliyyatların başa çatmasına baxmayaraq, bu partlayıcıların hələ də mülki vətəndaşlarımız və hərbçilərimiz arasında çoxsaylı itkilərə yol açdığı, Ermənistan tərəfinin isə beynəlxalq humanitar hüquqa zidd olaraq, minalanmış ərazilərin xəritəsini vermək istəmədiyi vurğulanıb.
Diqqətə çatdırılıb ki, bununla yanaşı, Ermənistanın vaxtilə işğalda saxladığı ərazilərdə Azərbaycana aid tarixi-mədəni abidələrin, kilsə, məscid, muzey və məzarlıqların bir çoxunu dağıdıb, bəzilərini isə özününküləşdirməyə çalışıb. Bildirilib ki, ölkəmiz Ermənistanın bu kimi vandalizm aktları ilə əlaqədar beynəlxalq qurumlara müraciət edəcək.
Səfir vurğulayıb ki, onilliklərlə davam edən hərbi təcavüzə rəğmən böyük iqtisadi uğurlara imza atmış, həyata keçirdiyi irimiqyaslı enerji və nəqliyyat layihələri ilə regionun simasını dəyişdirməyə nail olan Azərbaycanın hazırda 2021-ci il 11 yanvar tarixli üçtərəfli Bəyanatda da nəzərdə tutulduğu kimi, münaqişənin təsirinə məruz qalmış ərazilərin və ümumilikdə regionun yüksəlişinə yönələn səylərlə çıxış etdiyi halda, Ermənistanda bir sıra revanşist qüvvələrin qonşu ölkələrə qarşı ərazi iddiaları və nifrət siyasətini davam etdirirlər.
Bildirilib ki, regionda davamlı sülhün təmin edilməsi üçün Ermənistan tərəfi bu ərazi iddialarından əl çəkməli, Azərbaycanın ərazi bütövlüyünü tanımalı və xalqını barışığa hazırlamalıdır. Bu barışıq Ermənistana regional əməkdaşlıq formatlarına qoşulmağa imkan yarada bilər.
Müsahibə radio kanalının çoxsaylı izləyicisi olan sosial şəbəkə ünvanlarında da yayımlanıb.
Bölmənin digər xəbərləri
