MƏNTƏQƏ SEÇKİ KOMİSSİYALARININ ÜZVLƏRİ ÜÇÜN TƏLİM MƏŞĞƏLƏLƏRİ KEÇİRİLMİŞDİR
Xəbər verildiyi kimi, Mərkəzi Seçki Komissiyası (MSK) aşağı seçki komissiyaları üzvlərinin maarifləndirilməsi məqsədi ilə məntəqə seçki komissiyaları üçün təlim məşğələləri təşkil etmişdir.
110 saylı Zaqatala seçki dairəsi dairə seçki komissiyasının sədri Fikrət Mustafayev AZƏRTAC-ın müxbirinə bildirmişdir ki, avqustun 18-dən başlayaraq
dörd gün davam edən məşğələlərdə dairənin əhatə etdiyi 42 məntəqə seçki komissiyasının 252 üzvü iştirak etmişdir. Məşğələlərdə əyani vəsaitlərdən geniş istifadə edilməklə dinləyicilərə səsvermə günü məntəqələrdə işin təşkili, məntəqə seçki komissiyası sədrinin və üzvlərinin vəzifələri, seçkilərdə şəffaflığın
təmin edilməsi və digər prosedurlar barədə məlumat verilmişdir.
Məşğələlərin sonunda məntəqə seçki komissiyalarının üzvlərinə əyani vəsaitlər verilmişdir.
DSK sədri onu da bildirmişdir ki, 42 min 856 seçicinin qeydə alındığı dairədə qarşıdan gələn prezident seçkilərinin azad, demokratik və şəffaf keçirilməsi üçün hər cür şərait yaradılmış, dairə seçki komissiyası üçün yeni inzibati bina tikilib istifadəyə verilmiş, seçki məntəqələri lazımi inventar və avadanlıqla, rabitə ilə təmin olunmuşdur.
X X X
113 saylı Şəki şəhər seçki dairəsi dairə seçki komissiyasının sədri Rəsul Səfərovun verdiyi məlumata görə, MSK-nın təlim qrupu üzvlərinin iştirakı ilə keçirilən təlim məşğələləri məntəqə seçki komissiyaları üzvlərinin maarifləndirilməsi və peşə hazırlığının artırılmasında mühüm rol oynamışdır. Məşğələlərdə dairənin əhatə etdiyi 27 seçki məntəqəsinın 135 üzvü, habelə dairə seçki komissiyasının nümayəndələri iştirak etmişlər.
Dinləyicilər səsvermə günü məntəqə seçki komissiyaları üzvlərinin görəcəyi işlər, seçicilərə bülletenlərin verilməsi, səslərin hesablanması, seçki prosesində şəffaflığın təmin olunması, səsvermənin nəticələri barədə yekun protokollarının doldurulması qaydaları və digər məsələlər barədə məlumatlandırılmış, onları maraqlandıran suallara aydınlıq gətirilmişdir.
Xüsusi vurğulanmışdır ki, seçkilərin azad, demokratik və şəffaf şəraitdə keçirilməsi, ilk növbədə, məntəqələrdə səsvermə prosesinin mövcud təlimatlara uyğun təşkil edilməsindən, komissiya üzvlərinin peşə hazırlığının səviyyəsindən çox asılıdır. Odur ki, hər bir komissiya üzvü təlimatları daha dərindən öyrənməli, seçki qanununun tələblərinə ciddi əməl etməlidir.
Təlimlərin sonunda komissiya üzvlərinə yaddaş kitabçaları, protokol nümunələri və digər əyani vəsaitlər verilmişdir.
Belə təlimlər bölgənin digər seçki dairələrində də keçirilmişdir.
Bölmənin digər xəbərləri
