Məsciddə qətl: qatil İtaliyada təslim olub
Paris, 28 aprel, AZƏRTAC
Fransanın Qard bölgəsində “Grand–Combe” məscidində əslən Malidən olan müsəlman gənci qətlə yetirən şəxs İtaliyada saxlanılıb.
AZƏRTAC xəbər verir ki, 21 yaşlı qatil H. Olivye (şərti ad) Pistoya şəhərində polis bölməsinə təslim olub.
Hadisədən sonra yayılan videoda H. Olivye bu hərəkətinə görə özünü təbrik edib və qurbanının dinini təhqir edib. O, serial qatil olmaq üçün azı daha iki nəfəri öldürmək arzusunu ifadə edib.
Hadisədə müsəlman əleyhinə hərəkət izi olduğu vurğulanır. Dövlət ittihamçısı yerli televiziya kanallarına müsahibəsi zamanı əmin edib ki, şərait, yəni məsciddə namaz qılan şəxsin öldürülməsi, onun dini haqqında təhqiramiz ifadələr səsləndirilməsi faktı nəzərə alınmaqla, müsəlmanlara qarşı hərəkət, islamofob məzmunlu hərəkət nəzəriyyəsinə üstünlük verilir.
Bildirilir ki, qatil gənc müsəlmana 40-50 bıçaq zərbəsi vuraraq öldürüb.
Xatırladaq ki, Fransanın daxili işlər naziri hadisəyə gec reaksiya verdiyinə görə sərt tənqid olunub.
“İslamofob şəxs məsciddə bıçaqla qətl törədəndə Brüno Rötayo heç nə demir. Bu, nazirin niyyətləri haqqında çox şey danışan bir sükutdur” və ya “bu hadisə, kilsədə və ya sinaqoqda baş versəydi, ora getməzdən əvvəl iki gün gözləyərdinizmi?”, – deyə nazirə müraciət olunaraq, onu ikili standartlarına görə tənqid ediblər. Bir çox solçu parlamentarilər, hətta nazirin öz cəbhəsindən olan sağçılar belə onu məsuliyyətli olmağa çağırıblar.
Bölmənin digər xəbərləri
