MƏTBUAT ŞURASI REDAKSİYALARIN XİDMƏTİ AVTOMOBİLLƏRİ ÜÇÜN PRESS-KARTLAR HAZIRLAMIŞDIR
Milli Məclisin deputatları, Mətbuat Şurasının (MŞ) üzvləri, mətbuat orqanlarının rəhbərləri və Dövlət Yol Polisi İdarəsinin əməkdaşları təqdimat mərasimində iştirak etmişlər. MŞ-nin sədri Əflatun Amaşov kartlar barədə məlumat vermişdir. Natiq qeyd etmişdir ki, bu kartların tətbiqi iki əsas problemin həllinə kömək edəcəkdir. Yalandan jurnalist adından istifadəetmə hallarının qarşısı alınacaq və yol polisləri mətbuat nümayəndələrinə fakt toplamaq imkanı yaradacaqlar.
Press-kartlar redaksiyalardakı xidməti avtomobillərin qabaq və arxa şüşələrinin içəri üzündə yerləşdiriləcəkdir. Onların üzündə “PRESS”, arxasında isə etibarlılıq müddəti, mətbuat orqanının adı, yerləşdiyi ünvan, maşının nömrəsi və digər mühüm məlumatlar olacaqdır.
Çıxış edənlər bildirmişlər ki, bu kartlar heç kəsə yol hərəkət qaydalarını pozmaq və polis əməkdaşlarına tabe olmamaq səlahiyyəti vermir. Əksinə, bu kartlardan istifadə edən mətbuat nümayəndələri yüksək sürücülük mədəniyyəti nümayiş etdirməlidirlər.
Bölmənin digər xəbərləri
