Məzahir Əfəndiyev: Böyük sülh sazişinin imzalanmasına olan ümidlər doğrulur
Bakı, 17 dekabr, AZƏRTAC
İkinci Qarabağ - Vətən müharibəsindən sonra bir ildən çox müddət ərzində Azərbaycan uğurlu xarici siyasəti ilə böyük sülh sazişinin imzalanmasını, habelə regionda yeni quruculuq dövrünün başlanmasının vaxtı olduğunu ikitərəfli və çoxtərəfli görüşlərdə mövqe kimi nümayiş etdirib.
Bunu AZƏRTAC-a açıqlamasında Milli Məclisin deputatı Məzahir Əfəndiyev bildirib.
Deputat qeyd edib ki, eyni zamanda, postmüharibə çağırışlarını da nəzərə alaraq Azərbaycanın çoxvektorlu xarici siyasətində sülh və ədalət prinsiplərinin dəyişilməz olduğu bir daha vurğulanır. Prezident İlham Əliyevin bu prosesə şəxsən rəhbərliyi bundan sonrakı bütün görüşlərin də əhəmiyyətini artırır. Soçi görüşündən sonra - dekabrın 14-15-də Prezident İlham Əliyevin Avropa İttifaqının təşəbbüsü ilə təşkil olunan Brüssel səfəri bir daha Azərbaycana sülhə əsaslanmış mövqeyini açıq elan etmək imkanı verdi. Dekabrın 14-də Azərbaycan Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistanın baş naziri Nikol Paşinyanla ikitərəfli və üçtərəfli görüşləri məhz ölkəmizin əsaslandığı və irəli sürdüyü sülh təklifi əsasında müzakirələrin davam etdirilməsidir. Bu görüşlərin yekun Bəyanatında Azərbaycanın maraqları demək olar tam şəkildə təmin edildi. Belə ki, Bəyanatda istər sülhün təmin edilməsinə, itkin düşmüş şəxslər və onların taleyinə aydınlıq gətirilməsinə, humanitar minatəmizləmə səylərinə dəstək, istərsə də sərhədlərin demarkasiya və delimitasiyası, kommunikasiya infrastrukturunun yaradılması ilə bağlı edilən bütün çağırışlar ölkəmizin ədalətli mövqeyini ortaya qoyaraq, regionda hər hansı yeni müharibə risklərinin minimuma endirilməsi məqsədi daşıyır.
Milli Məclisin deputatı xüsusi qeyd edib ki, itkin düşmüş şəxslərin və onların taleyinə aydınlıq gətirilməsinin zəruriliyi Azərbaycan üçün olduqca vacibdir. Çünki Birinci Qarabağ müharibəsi zamanı Azərbaycan tərəfindən itkin düşmüş 4000-dən çox şəxsin taleyi naməlumdur. “Əslində, Avropa İttifaqı Şurasının Prezidenti Şarl Mişel cari ilin 17-18 iyulunda Cənubi Qafqaza səfəri zamanı Azərbaycanın Avropa üçün önəmli tərəfdaş olması, regionda sülh, əməkdaşlıq, quruculuq ilə bağlı fikirlərini aydın şəkildə ifadə etmişdir. Bu, Bəyanatda da Azərbaycanın Qələbəsinin de-yure reallaşdığını ifadə edir.
“Brüsselə səfəri çərçivəsində Prezident İlham Əliyevin NATO-nun Baş katibi Yens Stoltenberqlə görüşündə Alyansla etibarlı tərəfdaşlıq əlaqələri, Azərbaycan Silahlı Qüvvələrinin Əfqanıstanda “Qətiyyətli dəstək” əməliyyatlarındakı xidmətləri, NATO-nun aparıcı üzvlərindən biri olan Türkiyə ilə birgə hərbi təlimləri, habelə Avropanın enerji təhlükəsizliyinin təmin edilməsində ölkəmizin müstəsna rolu bir daha vurğulandı. Prezident İlham Əliyevin “Azərbaycan regionda yeni reallıqlar yaradıb” fikirləri artıq Avropa İttifaqı ölkələrinin rəhbərləri tərəfindən də qəbul olunmaqdadır. Dövlətimizin başçısının səfər çərçivəsində keçirilən Şimali Atlantika Şurasının iclasında iştirakı bir daha təsdiqləyir ki, artıq bütün Avropa ölkələrinin rəhbərlərinin və siyasətçilərinin yeni reallıqdan çıxış edərək öz dəstəklərini ifadə etməsi fikri formalaşır. Əsası 2009-cu ildə Praqada qoyulmuş Şərq Tərəfdaşlığının VI Sammitində Azərbaycan Prezidentinin iştirakı və çıxışı bir daha Avropa İttifaqının üzv dövlətlərlə, xüsusən də Azərbaycanda nəzərdə tutulacaq layihələrin hədəflərinin müəyyən olunmasına kömək göstərəcək. Şərq Tərəfdaşlığı Sammitinin yekun Bəyannaməsinin 11-ci bəndinin formalaşması ilə bağlı Prezident İlham Əliyevin xüsusi təkliflə çıxışının Avropa ölkələri liderləri tərəfindən nəzərə alınması dövlətimizin başçısına olan diqqətin göstəricisidir”, - deyə M.Əfəndiyev qeyd edib.
Deputat bildirib ki, keçirilmiş bütün görüşlər, əldə olunmuş birgə razılaşmalar ötən il noyabrın 10-da imzalanmış Bəyanatın bütün bəndlərinin tam icrasını da bir daha vacib edir. Postmüharibə mərhələsinin başlanğıcında Azərbaycanın xarici siyasəti və diplomatiyasında demək olar bütün dövlət maraqlarının nəzərə alınması Prezident İlham Əliyevin əldə etdiyi növbəti qələbədir və 2022-ci ildə böyük sülh sazişinin imzalanmasına böyük ümidlər yaradır.
Bölmənin digər xəbərləri
