MİLLİ MƏCLİS MDB DÖVLƏTLƏRİ ARASINDA MƏDƏNİ ƏLAQƏLƏRİN İNKİŞAFINA DAİR SAZİŞLƏRİ TƏSDİQ ETMİŞDİR
AZƏRTAC xəbər verir ki, Milli Məclis “MDB-nin iştirakçısı olan dövlətlərin kitabxanalararası abunəçilik sisteminin yaradılması haqqında” 1999-cu ilin yanvar ayında Saratov şəhərində və “Müstəqil Dövlətlər Birliyinin Mədəni əməkdaşlığına Dəstək Fondunun yaradılması haqqında Təsis Müqaviləsi”nə və ona əlavə olunmuş “Müstəqil Dövlətlər Birliyinin Mədəni Əməkdaşlığına Dəstək Fondunun Nizamnaməsi”nə qoşulmaq barədə 1998-ci ildə Moskva şəhərində imzalanmış Sazişləri təsdiq etmişdir.
Milli Məclisin sədri Murtuz Ələsgərov demişdir ki, bu sənədlər, MDB ölkələri arasında kitabxana, sənəd fondları və informasiya orqanlarından qarşılıqlı istifadə mexanizmlərinin təkmilləşdirilməsini, mədəniyyət sahəsində hökumətlərarası əməkdaşlığın inkişaf etdirilməsini və birgə mədəniyyət proqramlarının, ayrı-ayrı tədbirlərin həyata keçirilməsini nəzərdə tutur. Məlum olduğu kimi, 2005-ci il Rusiyada Azərbaycan ili elan olunmuşdur. Sazişlərin təsdiqi Azərbaycan mədəniyyətinin Rusiyada daha geniş təbliğini təmin edən mədəni-kütləvi tədbirlərin səmərəli keçməsinə, eləcə də gələn il Azərbaycanda Rusiya ilinin təşkilinə imkan yaradacaqdır. Azərbaycanın milli maraqlarına tam cavab verən bu sənədlər həm də ölkəmizin Müstəqil Dövlətlər Birliyinə daxil olan ölkələrlə elm, mədəniyyət və digər sahələrə dair nəşr olunmuş kitabların, jurnalların maneəsiz əldə olunmasına, mədəni əməkdaşlığın inkişafına geniş imkan yaradacaqdır.
Bölmənin digər xəbərləri
