SİYASƏT
Milli Məclisdə Azərbaycan-ATƏT əlaqələri müzakirə edilib VİDEO
Bakı, 17 mart, AZƏRTAC
Azərbaycan-ATƏT əlaqələri biristiqamətli deyil. Azərbaycan bütün istiqamətlərdə, iqtisadi, təhlükəsizlik, insan ölçüsünə dair sahələrdə bu təşkilat ilə əməkdaşlığa hazırdır. Ölkəmiz indiyədək bu istiqamətlərdə ATƏT-ə ciddi töhfələr verib.
AZƏRTAC xəbər verir ki, bu fikirlər martın 17-də Milli Məclis sədrinin müavini Bahar Muradovanın ATƏT-in fəaliyyətdə olan sədrinin Cənubi Qafqaz üzrə xüsusi nümayəndəsi Günther Baxler ilə görüşündə səslənib.
Bahar Muradova bu səfərin Azərbaycanın həm ATƏT, həm də təşkilata sədrlik edən Almaniya ilə münasibətlərində əhəmiyyətli olduğunu qeyd edib. O bildirib ki, Azərbaycan-ATƏT münasibətləri inkişaf edir. Biz bu təşkilatın bütün qurumları ilə əməkdaşlığa üstünlük veririk. Hər zaman ATƏT dəyərlərinə sadiq olduğumuzu əməli fəaliyyətimizdə sübut etməyə çalışırıq. Əlbəttə, Azərbaycanın bütün beynəlxalq təşkilatlarda, mövcud parlament assambleyalarındakı fəaliyyəti prioritet istiqamətlərdəndir. Lakin ATƏT bu qurumlar içərisində özünəməxsus yer tutur və bunun da ciddi səbəbləri var.
Bahar Muradova Almaniyanın sədrliyi dövründə ATƏT-in bütün qurumlarında bir çox vacib məsələlərin həlli istiqamətində yeni addımlar atılacağına əminliyini ifadə edib. Bildirib ki, həmin məsələlərin həlli bütün səylərin birləşdirilməsini tələb edir. Biz hər zaman bu məsələlər ətrafında Azərbaycanın qətiyyətli və beynəlxalq hüququn prinsiplərinə söykənən mövqeyini açıqlamışıq.
Milli Məclis sədrinin müavini qeyd edib ki, inkişafın özünün doğurduğu problemlər və bir sıra beynəlxalq dairələrin müxtəlif regionlardakı maraqları bu gün dünyanı çox həssas dönəmə gətirib çıxarıb. Bu həssaslığın doğurduğu problemlər aradan qalxmasa gələcəkdə çox çətin olacaq.
Bahar Muradova ATƏT-in Minsk qrupunun səmərəsiz fəaliyyəti ilə bağlı Azərbaycanın tənqidi fikirlərinin əsaslı olduğunu sübut edən müəyyən tədbirlər görüləcəyinə inandığını bildirib. O, Ermənistan-Azərbaycan, Dağlıq Qarabağ münaqişəsindən danışaraq, mövcud status-kvonun uzanmasının yalnız Ermənistanın maraqlarına xidmət etdiyini, eləcə də yeni-yeni münaqişə ocaqlarının yaranmasına səbəb olduğunu deyib. “Əlbəttə, biz düşünmürük ki, bir illik fəaliyyət ərzində Almaniya bu məsələnin tam həllinə nail ola biləcək. Lakin inanırıq ki, öz fəaliyyətinizlə bu məsələnin həlli istiqamətində addımlar atacaqsınız. Azərbaycan uzun illərdir bu problemlə yaşayır və onun həllinə çalışır”, - deyə Bahar Muradova əlavə edib.
Günther Baxler gələcəkdə də belə görüşlərin davamlı olaraq keçirilməsinə ümidvar olduğunu deyib. O, Almaniyanın sədrlik dövründə görəcəyi əsas işlərdən danışaraq bildirib ki, ATƏT-in fəaliyyətinin gücləndirilməsi əsas istiqamətlərdəndir. Qeyd edib ki, münaqişənin həlli üçün sədrlik çərçivəsində çox ciddi analizlər, təhlillər aparılmalıdır.
Görüşdə qarşılıqlı maraq doğuran bir sıra məsələlər müzakirə edilib.