MİLLİ MƏCLİSDƏ KEÇİRİLMİŞ GENİŞ MÜŞAVİRƏDƏ PAYIZ SESSİYASINDA GÖRÜLƏCƏK İŞLƏR MÜZAKİRƏ OLUNMUŞDUR
Parlamentin sədri sentyabrın 1-də fəaliyyətə başlayacaq payız sessiyasının qanunvericilik işləri planı haqqında, müzakirəsi nəzərdə tutulmuş qanun layihələri barədə fikirlərini bildirmişdir. Sədr demişdir ki, Milli Məclis, daimi komissiyalarda, şöbələrdə hazırlanmış bir sıra mühüm hüquqi sənədlərlə yanaşı, Azərbaycan Prezidentinin, respublika Ali Məhkəməsinin qanunvericilik təşəbbüsü qaydasında parlamentə təqdim etdiyi qanun layihələrini də payız sessiyasında müzakirə edəcəkdir. O, Avropa Şurası qarşısında götürülmüş öhdəliklərlə bağlı qanun layihələrinin müzakirəsinə və qəbuluna da xüsusi diqqət yetiriləcəyini vurğulamışdır.
Sonra Milli Məclis Aparatının rəhbəri Səfa Mirzəyev çıxış edərək payız sessiyasının qanunvericilik işləri planı haqqında ətraflı məlumat vermiş və demişdir ki, iş planında qanun layihələrinin hazırlanma müddətinin dəqiq tarixləri də müəyyənləşdirilmişdir.
Aparatın rəhbəri bildirmişdir ki, payız sessiyasında müzakirəyə çıxarılacaq ən mühüm sənədlərdən biri “2005-ci il Azərbaycan Respublikası dövlət büdcəsinin təsdiqi haqqında” qanun layihəsidir. O demişdir ki, müzakirəsi keçən sessiyalarda tamamlanmamış “Təhsil haqqında”, “Elm və dövlət elmi-texniki siyasəti haqqında”, habelə “İnformasiya azadlığı haqqında”, “Dövlət sirri haqqında”, “İxrac nəzarəti haqqında”, “Telekommunikasiya haqqında”, “Yaşayış minimumu haqqında”, “Məlumat bazalarının hüquqi qorunması haqqında”, “Azərbaycan xalçaçılıq sənətinin inkişafı və qorunması haqqında” qanun layihələri payız sessiyasında qəbul olunacaqdır.
Səfa Mirzəyev yeni qanun layihələri sırasında “Lobbiçilik fəaliyyəti”, “Dövlət qulluqçularının davranış qaydaları”, “Narkotik vasitələrin və psixotrop maddələrin dövriyyəsi”, “Qiymətli metallar və daşlar”, “Baytarlıq təbabəti”, “Tikinti fəaliyyəti”, “İrsi qan xəstəliyi olan şəxslərin sağlamlığının qorunması” haqqında hüquqi sənədlərin əhəmiyyəti barədə danışmışdır.
Milli Məclis sədrinin birinci müavini Arif Rəhimzadə, müavinlər Ziyafət Əsgərov, Gövhər Baxşəliyeva, daimi komissiya sədrləri Asya Manafova, Sirus Təbrizli, Eldar İbrahimov, Anar Rzayev, Hadi Rəcəbli, Şahlar Əsgərov, Səttar Səfərov, Səməd Seyidov, Əli Hüseynov, daimi komissiya sədrinin müavini Şaitdin Əliyev müzakirələrdə çıxış edərək 2004-cü il payız sessiyasının qanunvericilik işləri planı haqqında mülahizələrini, qeyd və təkliflərini bildirmiş, bir sıra aktual problemlərə toxunmuşlar.
Parlamentin sədri Murtuz Ələsgərov müşavirəyə yekun vurmuş, Milli Məclis Aparatı işçilərinin əmək haqlarının artırılması ilə əlaqədar Azərbaycan Prezidentinə böyük diqqət və qayğıya görə dərin təşəkkürünü bildirmiş və qarşıda duran vəzifələrdən danışmışdır. Sədr ölkəmizin başçısının diqqət və qayğısına cavab olaraq Milli Məclisin qanunvericilik sahəsində daha böyük uğurlar qazanacağına inamını ifadə etmişdir.
Sonra Milli Məclisin sədri “Təhsil haqqında” və “Elm və dövlət elmi-texniki siyasəti haqqında” qanun layihələrinin əhəmiyyətini xüsusilə qeyd etmiş, demişdir ki, keçən sessiyalardan qalmış bu çox mühüm qanun layihələrinin və digər sənədlərin müzakirəsi payız sessiyasında tamamlanmalıdır.
Daha sonra sədr “2005-ci il Azərbaycan Respublikası dövlət büdcəsinin təsdiqi haqqında”, “Dövlət qulluqçularının davranış qaydaları haqqında” və başqa qanun layihələri ilə əlaqədar fikirlərini açıqlamışdır.
Milli Məclisin sədri 2004-cü il payız sessiyasının işgüzar şəraitdə keçəcəyinə ümidvar olduğunu bildirmiş və müşavirə iştirakçılarına işlərində uğurlar arzulamışdır.
Bölmənin digər xəbərləri
