SİYASƏT
Milli Məclisin deputatı Avronest Parlament Assambleyasının iclasında iştirak edəcək
Bakı, 14 oktyabr (AZƏRTAC). Milli Məclisin deputatı, Avronest Parlament Assambleyasında Azərbaycan nümayəndə heyətinin rəhbəri və qurumun vitse-prezidenti Elxan Süleymanov Avronest PA-nın Büro iclasında iştirak etmək üçün oktyabrın 15-də Belçikanın paytaxtı Brüsselə yola düşəcək.
Milli Məclisin mətbuat xidmətindən AZƏRTAC-a verilən məlumata görə, iclasda qurumun cari və gələcək fəaliyyəti ilə bağlı müzakirələr aparılacaq, təkliflərə baxılacaq, bir sıra təşkilati məsələlər gündəmdə olacaq. Avropa Parlamentini Avronest PA-da təmsil edəcək yeni deputat heyəti Şərq Tərəfdaşlığı ölkələrinin nümayəndələrinə təqdim ediləcək, həmçinin dördüncü plenar sessiyaya hazırlıq işləri görüləcək. Bundan başqa, bu ilin oktyabr-noyabr aylarında Ukraynada və Moldovada keçirilməsi nəzərdə tutulan parlament seçkiləri ilə bağlı fikir mübadiləsi aparılacaq.
E.Süleymanov Büro iclasında müzakirə olunan məsələlərə ölkəmizin maraqları mövqeyindən münasibət bildirəcək.