MİLLİ MƏCLİSİN DEPUTATLARI SƏFƏRDƏN QAYITMIŞLAR
Xəbər verdiyimiz kimi, Azərbaycan parlamentinin nümayəndə heyəti noyabrın 3-dən 7-dək Brüsseldə səfərdə olmuşdur. Deputatlar NATO-nun iqamətgahında təşkilatın təmsilçiləri ilə işgüzar görüşlər keçirmiş, dinləmələrdə və müzakirələrdə iştirak etmişlər.
Nümayəndə heyətinin üzvü Vüqar Rəhimzadə AZƏRTAC-ın müxbiri ilə söhbətində səfərin səmərəli keçdiyini bildirərək demişdir ki, birinci gün polkovnik Nihat Kökmen NATO-nun fəaliyyəti barədə çıxış etdi. Polkovnik Karon Snəqin təqdimatında “Avropa Komandanlığı bu gün və gələcək perspektivlər” mövzusunda brifinq dinləmələri oldu, sual-cavab keçirildi. Burada siyasi bölmənin rəhbəri, general Yorq Şevinsteqr və digər hərbçilər iştirak edirdilər.
Sonra Mokselinin təqdimatında “Əməkdaşlığın əlaqələndirilməsi proqramı” mövzusunda məruzə oldu.
Ertəsi gün ABŞ-ın NATO-dakı təmsilçiliyinin proqram üzrə əlaqələndiricisi cənab Tomas Uaytla görüş keçirildi. Sonra “NATO-nun cari siyasi məsələləri”, “NATO-nun yeni əlaqələri: Rusiya, Qafqaz və Mərkəzi Asiya”, “Avroatlantik Əməkdaşlıq Şurası və Azərbaycan”, “Sivil elm vasitəsilə terrorizmlə mübarizə” mövzularında dinləmələr oldu və müzakirələr, “NATO əməkdaşlığı: Bu, Azərbaycan üçün nə deməkdir?” mövzusunda geniş diskussiya oldu.
Noyabrın 6-da nümayəndə heyətinin üzvləri Avropa Birliyi Parlamentinin geniş iclasında iştirak etdilər və bu qurumun işi ilə tanış oldular.
Bölmənin digər xəbərləri
