MİLLİ MƏCLİSİN MƏDƏNİYYƏT MƏSƏLƏLƏRİ DAİMİ KOMİSSİYASININ İCLASI KEÇİRİLMİŞDİR

27.08.2004 [18:09]
Çap et
A⁺ A^-

AZƏRTAC-ın müxbiri xəbər verir ki, avqustun 27-də Milli Məclisin mədəniyyət məsələləri daimi komissiyasının iclası keçirilmişdir. İclasda parlamentin yaz və növbədənkənar sessiyaları dövründə komissiyanın fəaliyyəti müzakirə olunaraq qiymətləndirilmiş, sonra qurumun payız sessiyası üçün iş planı təsdiq edilmiş və cari məsələlər müzakirə olunmuşdur.

Komissiyanın sədri Anar Rzayev ölkəmizin Prezidentinin “Azərbaycan dilində latın qrafikası ilə kütləvi nəşrlərin həyata keçirilməsi haqqında” 12 yanvar 2004-cü il tarixli Sərəncamının əhəmiyyətini diqqətə çatdırdı, eyni zamanda həmin sənəddə verilmiş əsərlərin çapının ləngiməsindən narahatlığını bildirdi. O, həmçinin “Şəhidlər muzeyi”nin yaradılması ilə bağlı təkliflərin müzakirəyə çıxarılmasını və deputatların bu işdə daha fəal iştirakını təklif etdi.

Sonra Milli Məclis Aparatı sosial qanunvericilik şöbəsinin müdiri Adilə Abbasova xalçaçılıq haqqında qanun layihəsinin payız sessiyasında ikinci oxunuşda müzakirəyə çıxarılacağını bildirdi, sənədlə bağlı bəzi mübahisəli məsələlərdən danışdı.

Deputat Mikayıl Mirzə milli mənəvi dəyərlərlə bağlı qanun layihəsinin hazırlanmasını və bununla əlaqədar işçi qrupunun yaradılmasını təklif etdi. Deputat Azərbaycan və Şərq ədəbiyyatında milli mənəvi dəyərlərə, adət-ənənələrə aid kifayət qədər material olduğunu və bundan istifadə edərək vahid qanun layihəsinin hazırlanmasının zəruriliyini bildirdi.

Təklif müzakirə olunaraq bəyənildi və həmin məsələ ilə bağlı işçi qrupunun yaradılması qərara alındı.

İclas cari məsələlərin müzakirəsi ilə başa çatdı.