MİLLİ MƏCLİSİN PAYIZ SESSİYASININ İLK İCLASI KEÇİRİLMİŞDİR
Parlamentin sədri Murtuz Ələsgərov sessiyanın ilk iclasını açıq elan
etdi. Azərbaycanın dövlət himni səsləndirildi.
Sonra Murtuz Ələsgərov deputatları sessiyanın başlanması münasibətilə təbrik etdi və parlamentin fəaliyyəti ilə bağlı hesabat verdi. Sədr dedi ki, Milli Məclis 2004-cü ilin yaz və növbədənkənar sessiyalarını uğurla başa vurmuşdur. Ölkəmizin ali qanunverici orqanı ümummilli liderimiz, müstəqil dövlətçiliyimizin memarı və qurucusu Heydər Əliyevin siyasi xəttinin ən layiqli davamçısı olan Azərbaycan Prezidenti İlham Əliyevin həyata keçirdiyi uzaqgörən daxili və xarici siyasəti fəal surətdə dəstəkləmiş, ölkəmizin inkişafı üçün həyata keçirilən işlərin hüquqi təminatını yaratmışdır. Yaz və növbədənkənar sessiyalarda Milli Məclisin 33 iclası keçirilmiş, iş planında nəzərdə tutulmuş, habelə qanunvericilik təşəbbüsü qaydasında təqdim olunan 127 qanun və qərarı qəbul, bir sıra beynəlxalq sazişləri təsdiq etmiş, Nazirlər Kabinetinin, Ombudsmanın hesabatlarını dinləmişdir. Parlamentin rəhbərliyi, deputatlar bir sıra səfərlər etmiş, ikitərəfli münasibətlərin inkişafında xeyli iş görmüşdür.
Milli Məclis payız sessiyasında da fəal işləyəcək, qarşıya qoyulan vəzifələri yerinə yetirəcək. Sessiyanın gündəliyinə “Təhsil haqqında”, “Dövlət sirri haqqında”, “Lobbiçilik fəaliyyəti haqqında” və daha 20-dən çox qanun layihəsini qəbul edəcəkdir.
Sonra deputatlar iş planının müzakirəsinə başladılar. Müxtəlif rəy və təkliflər nəzərə alınmaqla payız sessiyasının iş planı təsdiq olundu.
Bölmənin digər xəbərləri
