Milli Qurtuluş Günü münasibətilə keçirilən tədbirdə Ulu Öndərdən bəhs edən film nümayiş etdirilmişdir
Gəncə, 13 iyun (AZƏRTAC, Sabir Əliyev). Azərbaycan Dövlət Aqrar Universitetində 15 İyun-Milli Qurtuluş Gününə həsr edilmiş tədbir keçirilmişdir.
AZƏRTAC xəbər verir ki, tədbiri giriş sözü ilə universitetin rektoru, professor İbrahim Cəfərov açaraq Azərbaycanın tarixinə Milli Qurtuluş Günü kimi daxil olmuş 1993-cü il iyunun 15-i ərəfəsində görkəmli dövlət xadimi Heydər Əliyevin uzaqgörən siyasəti nəticəsində müstəqilliyimizi təhlükə altına alan insanların zərərsizləşdirilməsi istiqamətində həyata keçirdiyi tədbirlərdən danışmışdır.
Sonra universitetin Azərbaycan tarixi, fəlsəfə və hüquq kafedrasının dosentləri Nizami Əlizadə və Ceyhun Hüseynov “Heydər Əliyev müasir Azərbaycanın memarı və qurucusudur”, “Heydər Əliyev və milli quruculuq yolunun siyasi fəlsəfəsi”, energetika kafedrasının professoru Siyasət Məmmədov “Ulu öndər Heydər Əliyev Azərbaycanı güclü sənaye ölkəsinə çevirdi”, baş müəllim Nəbi Yusifov “Heydər Əliyev dünyanın ən ideal tarixi şəxsiyyətidir”, universitetin Heydər Əliyev adına təqaüdçüsü Günel Ələkbərova “Ümummilli lider Heydər Əliyev və Azərbaycan gəncliyi” mövzularında məruzələrlə çıxış etmişlər.
Dahi siyasi və dövlət xadimi Heydər Əliyevin həyat və fəaliyyətindən bəhs edən filmin nümayişindən sonra tələbələrin ifasında Ulu Öndərə həsr olunmuş şeirlər səsləndirilmişdir.
Bölmənin digər xəbərləri
