Mingəçevir: Şəhidlər Xiyabanında açıq dərs
Mingəçevir, 21 yanvar (AZƏRTAC). Azərbaycanın Milli Qəhrəmanı Rəşad Mirabovun adını daşıyan Mingəçevir şəhər 7 saylı orta məktəbdə 20 Yanvar faciəsinin 24-cü ildönümü ilə bağlı bədii kompozisiya nümayiş olunmuşdur.
Tədris ocağının akt zalına toplaşanlar o məşəqqətli gecənin dəhşətlərini bir daha yaşamış, şəhidlərin ruhunu ehtiramla anmışlar. Düşmən tapdağı altındakı torpaqlarımızı azad etmək, Azərbaycanın adını ucaltmaq üçün şagirdlərin elmə dərindən yiyələnməsinin vacibliyi qeyd edilmişdir. Sonra VIII sinif şagirdlərinin hazırladığı ədəbi-bədii kompozisiya təqdim olunmuş, sənədli film nümayiş etdirilmişdir.
Milli Qəhrəman Ruslan Muradov adına Mingəçevir şəhər Texniki Humanitar Liseyin pedaqoji kollektivi isə Şəhidlər Xiyabanında açıq dərs keçmişdir. “20 Yanvar qan yaddaşımızdır” adlanan dərsdə 24 il əvvəl sovet qoşunlarının Bakıda törətdikləri ağlasığmaz vəhşiliklər barədə məktəblilərə ətraflı məlumat verilmişdir. Açıq dərs çərçivəsində ibtidai sinif şagirdlərinin hazırladıqları ədəbi-bədii kompozisiya, faciə zamanı həlak olmuş məktəbli Larisa Məmmədovanın azadlıq istəyindən bəhs edən tamaşa nümayiş olunmuş və maraqla izlənilmişdir.
Bölmənin digər xəbərləri
