Misir “ərəb dördlüyünün” Qətərlə diplomatik əlaqələrinin bərpasının tərəfdarıdır
Qahirə, 9 dekabr, AZƏRTAC
Rəsmi Qahirə Misir, Səudiyyə Ərəbistanı, Birləşmiş Ərəb Əmirlikləri və Bəhreyndən ibarət “ərəb dördlüyünün” Qətərlə diplomatik əlaqələrinin bərpasının tərəfdarıdır.
AZƏRTAC xəbər verir ki, bu barədə Misirin Xarici İşlər Nazirliyi bəyanat yayıb.
Bəyanatda qeyd olunub ki, Misir yaxın vaxtlarda Qətərlə diplomatik əlaqələrin bərpası və münasibətlərin normallaşması üzrə Küveytin təşəbbüsünü dəstəkləyir. “Biz bu problemin həlli istiqamətində aparılacaq danışıqlara hazırıq. Eyni zamanda, qarşı tərəfin də konstruktiv mövqe nümayiş etdirəcəyinə ümid edirik”, - deyə XİN bəyan edib.
Qeyd edək ki, “ərəb dördlüyü” ölkələri 2017-ci ilin iyunundan Qətərlə diplomatik və iqtisadi əlaqələri tamamilə kəsib. Həmin dövlətlərdə Qətərin televiziya kanalları və informasiya agentliklərinin saytları da bağlanılıb. Bu ölkələri Dohanı beynəlxalq terrorizmi dəstəkləməkdə ittiham edirlər. Qətər isə bu iddiaları rədd edir. Əvvəllər “ərəb dördlüyü” Dohanın qarşısında 13 bənddən ibarət tələblər paketi qoyub, lakin qarşı tərəf onları qəbul etməyib. Münasibətlərin normallaşması üçün ABŞ Dövlət Departamenti də səy göstərir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
