MİSİR PREZİDENTİ RUSİYALI HƏMKARINA MƏSLƏHƏT VERƏCƏK
Onun sözlərinə görə, prezident vəzifəsinə dalbadal ancaq iki müddətə seçilmək hüququ nəzərdə tutan Rusiya Konstitusiyası ABŞ-ın əsas qanununu “təqlid edir”. 25 ildir Misirə rəhbərlik edən Hüsni Mübarək demişdir: “Siz amerikalıları tənqid edir, amma eyni zamanda, onlardan nümunə götürürsünüz? Şəxsən mən hesab edirəm ki, Prezident Putin çox yaxşı, ağıllı liderdir. Putin Rusiyaya gərəkdir”.
Misir rəhbəri həmçinin bildirmişdir ki, Vladimir Putinin dövründə Rusiya “Yaxın Şərq problemlərinə marağını və regionda öz nüfuzunu bərpa etmişdir. İndi o, çox fəaldır, dünyada da, regionumuzda da vəziyyəti yaxşı başa düşür”.
Hüsni Mübarək Moskvaya səfər zamanı Prezident Putinlə və hökumətin sədri Mixail Fradkovla görüşüb, ikitərəfli münasibətləri və Yaxın Şərq problemlərini müzakirə etmək niyyətindədir.
Misir rəhbərinin dediyinə görə, azad ticarət haqqında ikitərəfli sazişə dair danışıqlar artıq başlanmışdır. Müzakirə edilən layihələrdən biri Misirdə Rusiyanın xüsusi sənaye zonasının yaradılması ilə bağlıdır. Mübarək demişdir ki, Rusiyadan Misir iqtisadiyyatına yatırılan sərmayənin həcmi, habelə bu ölkədən gələn turistlərin sayı artır.
Son iki ildə Misirlə Rusiya arasında əmtəə dövriyyəsinin illik həcmi 400 milyon dollardan 1,3 milyard dollara çatmışdır. 2006-cı ildə Qahirədə Yaxın Şərqdə ilk Rusiya Universiteti tikilmişdir. Bundan başqa, Rusiya şirkətləri Misirdə ilk atom elektrik stansiyasının tikintisi üçün müsabiqədə iştirak edəcəklər.
