Misir Senatına seçkilərin ilk turunun nəticələri açıqlanıb
Qahirə, 20 avqust, AZƏRTAC
Misirdə uzun illərdən sonra fəaliyyəti bərpa olunan parlamentin yuxarı palatasına keçirilmiş seçkilərin ilk turunun nəticələri açıqlanıb.
AZƏRTAC xəbər verir ki, Milli Seçki Komissiyasının sədri Ləşin İbrahim səsvermədə 63 milyon seçicidən 8 milyon 959 mininin iştirak etdiyini bildirib.
Qeyd olunub ki, ölkə üzrə seçici fəallığı cəmi 14,23 faiz olub. Milli Seçki Komissiyası bunu COVID-19 pandemiyası ilə izah edir. Xaricdə yaşayan Misir vətəndaşlarının səslərinin hesablanması da yaxın günlərdə başa çatacaq. L.İbrahim əlavə edib ki, yetərincə səs toplaya bilməyən və ikinci tura qalan namizədləri üçün seçki dairələrində təkrar səsvermə sentyabrın 8-də keçiriləcək. Onun sözlərinə görə, Senatda 11 siyasi partiya təmsil olunacaq.
Misirin 196 illik tarixində Senat bir neçə dəfə fəaliyyət göstərib və sonradan ləğv edilib. 2019-cu ildə ölkə Konstitusiyasına edilən dəyişiklikdən sonra Senata seçkilərin keçirilməsinə qərar verilib. Parlamentin aşağı palatasında qəbul edilən və Misir Prezidenti tərəfindən imzalanan qanuna görə, Senat 300 üzvdən ibarət olacaq. Senatorların üçdəbiri proporsional, daha 30 faizi majoritar qayda ilə seçiləcək, qalanı isə dövlət başçısı tərəfindən təyin ediləcək. Senatdakı yerlər uğrunda 27 dairədə 787 namizəd mübarizə aparır.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
