Misir sudanlı qaçqınların qayıdışını asanlaşdırmaq üçün xüsusi qatar ayırıb
Qahirə, 21 iyul, AZƏRTAC
Sudan ordusunun son ardıcıl qələbələri, bir sıra vilayətləri və şəhərləri üsyançı Çevik Dəstək Qüvvələrindən azad etməsi nəticəsində köçkün və qaçqınlar öz yerlərinə geri dönməyə başlayıblar. Misir ölkəyə sığınmış sudanlı qaçqınların könüllü geri dönmələrini asanlaşdırmaq üçün xüsusi qatar ayırıb.
AZƏRTAC yerli mediaya istinadla xəbər verir ki, 1940 saylı qatar qaçqınları Qahirədən Asuana, oradan da Nil çayında qayıqlarla Sudana çatdıracaq.
Öz növbəsində, Sudan səfirliyi də qaçqınların geri dönməsində yaranmış nəqliyyat problemini həll edib və onların avtobuslarla daşınmasına kömək edir. Misirin əlaqədar təşkilatları sudanlıların geri dönmələri üçün bütün lazımi tədbirləri həyata keçirdiklərini bildiriblər.
BMT-nin məlumatına görə, 2023-cü ilin aprelində başlamış vətəndaş müharibəsi nəticəsində on minlərlə insan ölüb, 11 milyondan çox sudanlı qaçqın və köçkünə çevrilib. Onlardan 3,1 milyonu xarici ölkələrə qaçıb. BMT-nin Misirdəki nümayəndəliyi bildirir ki, Misirdə rəsmi qeydiyyata alınmış sudanlı qaçqınların sayı 546-746 min arası dəyişir. Misir tərəfinin məlumatlarına görə isə ölkəyə müharibədən qaçan 2 milyona yaxın sudanlı sığınıb.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
