Misirin informasiya agentliyi: Azərbaycan Qarabağda kompleks bərpa işlərinə başlayır
Qahirə, 10 fevral, AZƏRTAC
Misirin “Asiaelyoum” informasiya agentliyinin saytında Azərbaycanın işğaldan azad edilmiş ərazilərində aparılacaq bərpa-quruculuq işləri haqqında məqalə yayılıb.
AZƏRTAC xəbər verir ki, “Azərbaycan Qarabağın şəhərlərində kompleks bərpa işlərinə başlayır” sərlövhəli məqalədə Ermənistan işğalından azad edilmiş şəhərlərin müasir standartlara uyğun olaraq yenidən inşa ediləcəyi qeyd olunur. “Bu gün Qarabağın Ermənistan tərəfindən dağıdılmış, talan edilmiş və xarabalığa çevrilmiş şəhərləri bir kabus məkanını xatırladır. Ağdam, Füzulu, Cəbrayıl və Zəngilanda şəhər, qəsəbə və kəndlərin yerində dağıdılmış binaların qalıqları və məhv edilmiş infrastrukturun izləri qalır. Bu yazılarda Azərbaycan Prezidenti İlham Əliyev bəyan edib ki, bu şəhərlərin qədim ruhu və tarixi-mədəni özəllikləri qorunub saxlanılmaqla yeni “ağıllı şəhərlər” salınacaq”, - deyə məqalədə vurğulanır.
Məqalədə diqqətə çatdırılır ki, bir neçə gün əvvəl Azərbaycan Prezidentinin köməkçisi Hikmət Hacıyev də xarici diplomatik missiyaların rəhbərləri ilə birlikdə işğaldan azad edilmiş ərazilərdə olub, onlara aparılacaq bərpa-quruculuq işləri barədə ətraflı məlumat verib. Türkiyənin Azərbaycandakı səfiri, öz növbəsində, Ankaranın rekonstruksiya işlərinə hər cür yardım göstərəcəyini bəyan edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
