Monakoda törədilən partlayışda ukraynalı oliqarx və daha iki nəfər yaralanıb
Bakı, 30 iyun, AZƏRTAC
İyunun 29-da axşam saatlarında Monakoda yaşayış binasında baş verən partlayış nəticəsində üç nəfər yaralanıb, onlardan ikisinin vəziyyəti ağırdır. Hakimiyyət orqanları bildirib ki, bu insident təhlükəsizliyi ilə seçilən knyazlığı sarsıdan görünməmiş hadisədir.
AZƏRTAC xarici mediaya istinadla xəbər verir ki, Fransa ilə sərhədin yaxınlığında, Rue Révérend Père Louis Frolla küçəsindəki binanın qarşısında qoyulan çanta partlayıb. Baş verən partlayışda cütlük və bir yeniyetmə yaralanıb.
AFP agentliyi bildirib ki, yaralananlardan biri ukraynalı oliqarx Vadim Yermolayevdir.
Monako Knyazlığının dövlət naziri Kristof Mirmand hadisənin çox güman ki, hücum olduğunu və polisin araşdırma apardığını bildirib. O, partlayışın boltlar və güllələr ehtiva edən partlayıcı qurğu tərəfindən törədildiyini deyib. Nazir əlavə edib: “Bildiyim qədər, tarixdə ilk dəfədir ki, knyazlıqda belə bir hadisə baş verir”.
Monako şahzadəsi II Albert hadisəni “dəhşətli cinayət” və bütün knyazlıq üçün şok insident adlandırıb.
Bölmənin digər xəbərləri
