DÜNYA
Monteneqro müharibə cinayətində şübhəli bilinən şəxsi Kosovoya təhvil verməyib
Podqoritsa, 26 oktyabr, AZƏRTAC
Monteneqro 1999-cu ildə Kosovo münaqişəsi zamanı müharibə cinayəti törətdiyi iddiası ilə Priştina hakimiyyəti tərəfindən axtarışa verilən Kosovo serbi Momçilo Vukotiçi ekstradisiya etməkdən imtina edib.
AZƏRTAC xəbər verir ki, Monteneqronun Ədliyyə Nazirliyi rəsmi Priştinanın M.Vukotiçin ekstradisiyası üçün adekvat əsaslar vermədiyini əsas gətirərək onu Kosovoya göndərməmək qərarına gəlib.
“Kosovo Prokurorluğunun istintaqa başlanması ilə bağlı qərarında M.Vukotiçin hansı cinayət əməllərinin tərkib hissəsi olduğu aydın göstərilmir. Monteneqronun bu sorğunu rədd etmək qərarı “Beynəlxalq hüquqi yardım haqqında” qanuna və Ekstradisiya haqqında Avropa Konvensiyasına əsaslanır”, - deyə nazirliyin məlumatında bildirilir.
Qeyd edək ki, M.Vukotiç müharibə cinayətinə iştiraka görə Kosovo tərəfindən axtarışa verilib və oktyabrın 1-də Monteneqroda həbs olunub.
Nihad Budaqov
AZƏRTAC-ın xüsusi müxbiri
Podqoritsa