Moskva Ankara ilə Yerevan arasında dialoq aparmaq niyyətini alqışlayır
Moskva, 15 dekabr, AZƏRTAC
Ermənistan-Türkiyə münasibətlərinin normallaşması regionda ümumi vəziyyətin yaxşılaşmasına töhfə verə bilər və təbii ki, ölkələr və xalqlar arasında sağlam etimad və mehriban qonşuluq mühitinin formalaşdırılmasına kömək edər.
AZƏRTAC xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova Moskvada keçirdiyi brifinqdə bildirib.
Diplomat vurğulayıb ki, Moskva son zaman Ankara və Yerevanın münasibətlərin normallaşmasının müzakirə edilməsi üçün ikitərəfli dialoqa başlamaq niyyətini alqışlayır. “Tərəflərin bu məqsədlər üçün xüsusi nümayəndələrin təyin edilməsi bu istəyin inkişafı yolunda məntiqli və ağlabatan addımdır. Biz öz tərəfimizdən bu prosesə hər cür kömək etməyə hazırıq”, - deyə o əlavə edib.
M.Zaxarovanın sözlərinə görə, Rusiya regionda problemlərin həll edilməsinə, əlaqələrin və mehriban qonşuluğun möhkəmləndirilməsinə yönəlmiş addımları təşviq etməyə hazırdır. Dekabrın 10-da Moskvada keçirilən “3+3” Məşvərətçi Regional Platformasının iclasının təşkili Ermənistan və Türkiyənin, eləcə də formatın digər iştirakçılarının yaxınlaşmasına köməklik edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
