MÜASİR TEXNOLOGİYALAR SAĞLAMLIĞIN KEŞİYİNDƏDİRLƏR
Bu il sentyabrın 30-dan oktyabrın 2-dək Volqoqrad Elmi Tədqiqat Taun Əleyhinə Mübarizə İnstitutunun bazasında “MDB ölkələri ərazisində yoluxucu xəstəliklərə qarşı mübarizənin qlobal strategiyasının həyata keçirilməsində müasir texnologiyalar” mövzusunda dövlətlərarası elmi-praktik konfrans keçiriləcəkdir. MDB İcraiyyə Komitəsinin mətbuat xidmətindən AZƏRTAC-a verilən məlumatda bildirilir ki, konfrans çərçivəsində Birlik dövlətləri ərazisinin sanitar mühafizəsi və xüsusi təhlükəli yoluxucu xəstəliklərin yayılması problemləri üzrə əlaqələndirmə şurasının iclası olacaqdır.
İclasda Əlaqələndirmə Şurasının son iki ildə fəaliyyətinin nəticələri və 2009-cu il üçün vəzifələr, Rusiyada beynəlxalq tibbi-sanitariya qaydalarının tətbiq edilməsi təcrübəsi, MDB ölkələrində əhalinin sanitar-epidemioloji təhlükəsizliyi sahəsində fövqəladə halların aradan qaldırılmasında ixtisaslaşdırılmış epidemiya əleyhinə briqadaların tətbiqinə dair sazişin layihəsi, eləcə də bu cür fövqəladə hadisələrə qarşı mübarizə üzrə dövlətlərarası mərkəzin yaradılması zəruriyyəti ilə bağlı məsələ müzakirə ediləcəkdir.
Konfrans iştirakçıları beynəlxalq tibbi-sanitariya qaydalarının həyata keçirilməsində, fövqəladə halların qarşısının alınması və onların nəticələrinin aradan qaldırılması üçün MDB ölkələrinin səmərəli potensialının təmin edilməsində müasir texnologiyalar, eləcə də yeni epidemioloji risk və təhlükələrə qarşı mübarizə şəraitində müasir informasiya-təhlil, proqnoz-modelləşdirmə, skrininq-monitorinq və nəzarət texnologiyaları haqqında informasiya mübadiləsi aparacaqlar.
