Müəllim: Şagirdlərimin illər sonra məni xatırlaması ən böyük qazancımdır
Bakı, 5 oktyabr, AZƏRTAC
Zeybə Salamova ali təhsilini Bakı Dövlət Universitetinin Filologiya fakültəsində alıb. Otuz beş ildən artıqdır müəllimlik fəaliyyəti ilə məşğul olan Zeybə Salamova çoxlu sayda şagirdlərin təhsil və tərbiyəsində yaxından iştirak edib. Texniki-Humanitar Liseyin Azərbaycan dili və ədəbiyyatı müəllimi Zeybə Salamova AZƏRTAC-a müsahibəsində peşə seçiminə təsir edən amillərdən, müəllimlik fəaliyyətindən, şagirdlərindən öyrəndiklərindən, müasir müəllimin məsuliyyətindən və yaddaşında iz qoymuş şagirdlərindən danışıb.
“Mənim üçün müəllimlik yalnız dərs deməkdən, kitabdakı mövzuları şagirdə çatdırmaqdan ibarət olmayıb. Müəllimin qarşısında daha böyük məsuliyyət dayanır. Mənim missiyam uşaqları ilk növbədə əsl Azərbaycan övladı kimi yetişdirməkdir. Onlara yalnız bilik vermək deyil, insanlara hörmət etməyi, öz davranışlarına məsuliyyətlə yanaşmağı, milli-mənəvi dəyərlərimizi qorumağı aşılamaq da müəllimin vəzifəsidir.
İllər keçdikcə başa düşdüm ki, müəllim əməyinin nəticəsi hər zaman dərhal görünmür. Bəzən bir şagirdin həyatına verdiyiniz kiçik bir töhfənin onun gələcəyində nə qədər böyük rol oynadığını illər sonra görürsünüz. Mən də fəaliyyətim boyu öyrəndim ki, şagirdlər peşəsini vicdanla yerinə yetirən müəllimə illər keçsə belə dəyər verir və onu yada salırlar. Bu, müəllim üçün çox böyük mənəvi qazancdır.
Otuz beş il müəllimlik fəaliyyətim ərzində müxtəlif xarakterli, müxtəlif dünyagörüşünə və fərqli imkanlara malik şagirdlərlə çalışmışam. Hər birinin özünəməxsusluğu olub. Amma bütün şagirdlərə münasibətdə dəyişməyən bir prinsipim var: onlara şəxsiyyət kimi yanaşmaq və hörmət etmək. Çünki müəllimin şagirdə verdiyi dəyər onun özünəinamına da təsir edir. Uşağın sizi illər sonra xatırlaması, sizinlə görüşmək istəməsi müəllim üçün ən böyük qiymətlərdən biridir. Bu gün müəllim olmaq çox böyük məsuliyyət və deyərdim ki, böyük zəhmət tələb edir. Müasir müəllim yalnız dərs deməklə kifayətlənməməlidir. Uşaqların maraqları, informasiya əldə etmək imkanları əvvəlki illərlə müqayisədə tamamilə fərqlidir. Buna görə müəllim də daim öz üzərində işləməli, uşaqları anlamalı, onların dünyasına yaxın olmağı bacarmalıdır. Müəllim yalnız məlumat verən deyil, həm də şagirdin şəxsiyyət kimi formalaşmasına istiqamət verən insandır. Müasir dövrdə uşaqlara milli-mənəvi dəyərlərimizin aşılanması xüsusi əhəmiyyət daşıyır. Onlar müasir dünyanın bütün yeniliklərini bilməklə yanaşı, azərbaycanlı olduqlarını da unutmamalıdırlar. Bizim gözəl adət-ənənələrimiz var - böyüyə hörmət etmək, böyüyün yanında ayağa qalxmaq və digər mənəvi dəyərlər. Bunlar bizim keçmişdən miras qalan xüsusiyyətlərimizdir. Mən istəyirəm ki, şagirdlərimiz müasir dünyaya açıq olmaqla yanaşı, öz milli kimliklərini və dəyərlərini də qorusunlar”, - deyə müsahibimiz bildirib.
Zeybə Salamova deyir ki, şagirdlərinin illər sonra onunla əlaqə saxlaması müəllimlik peşəsinə bağlılığını daha da gücləndirir: “Bütün fəaliyyətim boyu hər dərs ilinin əvvəlində və ya sonunda, hətta illər keçsə də, mənim görüşümə gələn şagirdlərim olub. Elə şagirdlərim var ki, 20-21 il keçməsinə baxmayaraq, məni yada salır, görüşməyə gəlir, bayramlarda təbrik edirlər. Mənim üçün bundan böyük sevinc ola bilməz.
Bu gün şagirdlərimin sorağı dünyanın müxtəlif yerlərindən - Amerikadan, Almaniyadan, Londondan gəlirsə, bu, mənim üçün çox böyük xoşbəxtlikdir. Onların harada yaşamasından, hansı peşəni seçməsindən asılı olmayaraq, illər sonra müəllimlərini xatırlamaları insana göstərir ki, çəkdiyi zəhmət hədər getməyib.
Müəllim üçün ən böyük mükafat şagirdinin illər sonra sizi xatırlaması, sizinlə görüşmək istəməsi və həyatında müəlliminin də bir izi olduğunu düşünməsidir. İnsan illər ərzində çox şey qazanır, çox şey itirir, amma yetişdirdiyi şagirdlərin sevgisi və hörməti qalır. Mən bu gün geriyə baxanda görürəm ki, illər ərzində qazandığım ən böyük sərvətlərdən biri məhz şagirdlərimdir. Müəllimlik uzun bir yoldur. Bu yolda yorulduğun, çətinlik çəkdiyin günlər də olur. Amma illər sonra qarşına vaxtilə dərs dediyin şagird çıxıb “Müəllim, sizi xatırlayıram” deyəndə bütün çətinliklər arxa planda qalır. Bu gün dünyanın müxtəlif yerlərindən şagirdlərimin sorağını eşidirəmsə, deməli, boşuna yaşamamışam. Mənim üçün müəllimlik fəaliyyətimin ən böyük mənası da budur”.
Müxbir - Nərmin Muradzadə
Bölmənin digər xəbərləri
