Murmanskda Azərbaycanlıların Soyqırımı Gününə həsr olunmuş tədbir keçirilmişdir
Bakı, 31 mart (AZƏRTAC). Murmanskda Azərbaycanlıların Soyqırımı Gününə həsr olunmuş tədbir keçirilmişdir. Tədbirdə Rusiyanın Murmansk şəhərinin müxtəlif milli diasporlarının nümayəndələri, Murmansk vilayətinin Milli Mədəniyyət Mərkəzinin rəhbərliyi və üzvləri, regionun Azərbaycan ictimaiyyətinin nümayəndələri, Rusiyanın Azərbaycanlı Gənclər Birliyinin (RAGB) və Ümumrusiya Azərbaycanlılar Konqresinin (ÜAK) Murmansk regional bölmələrinin fəalları, jurnalistlər iştirak etmişlər.
Murmansk vilayətinin İctimai Palatasının üzvü, ÜAK-ın Murmansk vilayət bölməsinin sədri Afil Hüseynov tədbir iştirakçılarına bildirmişdir ki, hər il martın 31-də ölkədə Azərbaycanlıların Soyqırımı Günü qeyd edilir. 1992-ci il martın 26-da Azərbaycan Respublikasının Prezidenti Heydər Əliyevin Fərmanı ilə təsis edilmiş həmin tarixin anılması Azərbaycan xalqının tarixindəki faciəli hadisələrin xalqımızın yaddaşına həkk olunduğunu göstərir.
Azərbaycanda, eləcə də Azərbaycan diasporu tərəfindən onun hüdudlarından kənarda həmin gün 1918-ci ilin martında Bakıda və Bakı quberniyasında baş vermiş hadisələrin qurbanlarının xatirəsinə həsr olunmuş tədbirlər keçirilir.
RAGB-nin Murmansk regional bölməsinin sədri Vüsal İbrahimov bildirmişdir ki, 1918-ci ilin mart-aprel aylarında azərbaycanlılara qarşı törədilmiş soyqırımı aktları XX əsrin sonlarında da təkrarlanmışdır. 1988-ci ildə ermənilər azərbaycanlılara qarşı yeni əsassız ərazi iddiaları ilə çıxış etmişlər. Erməni işğalçılarının deportasiya, soyqırımı və etnik təmizləmə siyasəti nəticəsində torpaqlarımızın 20 faizi işğal olunmuş, bir milyondan çox vətəndaşımız doğma yurd-yuvalarından didərgin salınmışdır.
ÜAK və RAGB-nin Murmansk regional bölmələrinin mətbuat xidmətinin rəhbəri Əlihüseyn Şükürov AZƏRTAC-a bildirmişdir ki, tədbirdə ermənilərin xalqımıza qarşı soyqırımı siyasətinin iki əsrlik tarixindən söz açan sənədli film nümayiş etdirilmişdir. Həmvətənlərimiz çıxışlarında bildirmişlər ki, dünya ictimaiyyəti artıq təcavüzkarı və təcavüzə məruz qalan ölkəni yaxşı tanıyır. Azərbaycan xalqı inanır ki, Prezident İlham Əliyevin uğurlu xarici siyasi kursu sayəsində Azərbaycan torpaqları tezliklə azad ediləcək və qaçqınlar öz tarixi torpaqlarına qayıdacaqlar.
Xatırladaq ki, ermənilər 1918-ci ilin mart-aprel aylarında Bakı, Şamaxı, Quba, Muğan və Lənkəranda 50 mindən çox azərbaycanlı qətlə yetirmiş, onların evlərini qarət etmiş, on minlərlə insanı ata-baba yurdundan didərgin salmışlar. Təkcə Bakıda təqribən 30 min azərbaycanlı xüsusi amansızlıqla öldürülmüş, Şamaxı qəzasında 58 kənd viran qoyulmuş, təxminən 7 min adam, o cümlədən 1653 qadın və 965 uşaq qətlə yetirilmişdir. Quba qəzasında 122 müsəlman kəndi yerlə-yeksan edilmiş, Qarabağın dağlıq hissəsində 150-dən çox, Zəngəzur qəzasında 115 azərbaycanlı kəndi vəhşicəsinə dağıdılmış, cinsinə və yaşına fərq qoyulmadan əhaliyə dəhşətli divan tutulmuşdur. İrəvan quberniyasında 211, Qars vilayətində 92 azərbaycanlı kəndi dağıdılmış, yandırılmış və talan edilmişdir.
Bölmənin digər xəbərləri
