“Müstəqilliyimiz əbədidir” adlı yazı müsabiqəsinin qalibləri mükafatlandırılıb
Bakı, 10 may, AZƏRTAC
Mayın 10-da Səfərbərlik və Hərbi Xidmətə Çağırış üzrə Dövlət Xidmətinin Aparatında ümummilli lider Heydər Əliyevin anadan olmasının 95-ci ildönümü münasibətilə təntənəli tədbir keçirilib.
AZƏRTAC xəbər verir ki, Azərbaycanın dövlət himninin səsləndirilməsi ilə başlayan tədbirdə Səfərbərlik və Hərbi Xidmətə Çağırış üzrə Dövlət Xidməti rəisinin birinci müavini, general-mayor Zaur Abdullayev çıxış edərək ölkəmizin dövlətçilik tarixində ümummilli lider Heydər Əliyevin misilsiz xidmətlərindən danışıb.
Ulu Öndərin həyat və fəaliyyətinin əsl vətənpərvərlik məktəbi olduğunu vurğulayan Z.Abdullayev qeyd edib: “Ümummilli Lider hələ sovet dövründə, Dövlət Təhlükəsizlik Komitəsinin sədri, Mərkəzi Komitənin birinci katibi vəzifələrində işləyərkən daim vətənpərvərlik örnəyi nümayiş etdirib, ölkəmizin inkişafı naminə yorulmadan mübarizə aparıb. Ulu Öndər Azərbaycana bağlılığını, ölkəmizin çiçəklənməsi naminə fəaliyyətini respublikadan kənarda, SSRİ Nazirlər Soveti sədrinin birinci müavini vəzifəsində çalışarkən də davam etdirib, əməli işləri ilə vətənpərvərlik nümunəsi göstərib”.
Bildirilib ki, ümummilli lider Heydər Əliyevin anadan olmasının 95-ci ildönümü münasibətilə Xidmət tərəfindən il ərzində silsilə tədbirlər keçirilir. KİV nümayəndələri arasında atıcılıq turniri, orta məktəb şagirdləri arasında “Müstəqilliyimiz əbədidir” adlı yazı, “Müstəqil Azərbaycanın memarı” adlı rəsm müsabiqələri bu tədbirlərin bir hissədir.
Tədbirdə ulu öndər Heydər Əliyevin anadan olmasının 95-ci ildönümünə həsr edilmiş “Müstəqilliyimiz əbədidir” adlı yazı müsabiqəsinin qalibləri mükafatlandırılıb.
“Müstəqilliyimiz əbədidir” yazı müsabiqəsinin münsiflər heyətinin sədri, polkovnik Niyaz Məmmədov çıxışında müsabiqə haqqında ətraflı məlumat verərək deyib: “Cari il martın 30-dan aprelin 30-dək olan müddətdə vətəndaşlar tərəfindən Xidmətin elektron poçt ünvanı vasitəsilə müsabiqəyə 3 mindən çox yazı göndərilib. Müsabiqədə respublikanın bütün rayon və şəhərlərindən olan məktəblilər fəal iştirak ediblər. Münsiflər heyəti yekunda 10 ballıq sistem üzrə yazıları qiymətləndirərək qalibləri müəyyənləşdirib”.
Sonra müsabiqənin qalibləri açıqlanıb. Münsiflər heyətinin qərarına əsasən I yerin sahibi Balakən Rayon Texniki-humanitar Liseyin şagirdi Günel Nuriyeva olub. İkinci yerə Bakı şəhəri Nəsimi rayon 151 saylı orta məktəbin şagirdi Qalib Fərzəliyev, üçüncü yerə isə Qusar rayon 6 saylı orta məktəbin şagirdi Aydan Həmidova layiq görülüb.
Qaliblərə diplom və mükafatlar təqdim edilib.
Günel Nuriyeva və Aydan Həmidova Ümummilli Liderin xatirəsinə həsr edilmiş müsabiqənin qalibləri olduqlarına görə fəxr etdiklərini diqqətə çatdırıblar.
Tədbirdə çıxış edən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvi Emin Həsənli bu formatda keçirilən müsabiqələrin ulu öndər Heydər Əliyevin vətənpərvərlik irsinin gənc nəslə çatdırılmasına və onların milli dəyərlər əsasında tərbiyə edilməsinə mühüm töhfə verdiyini bildirib.
Sonra Səfərbərlik və Hərbi Xidmətə Çağırış üzrə Dövlət Xidməti Aparatının və Bakı Qarnizonunun hərbi qulluqçuları Fəxri xiyabanda ümummilli lider Heydər Əliyevin məzarını ziyarət ediblər.
Bölmənin digər xəbərləri
