REGİONLAR
Muxtar respublikada dövlət uşaq siyasəti uğurla həyata keçirilir
Naxçıvan, 22 noyabr, AZƏRTAC
Ölkəmizdə uşaqlara diqqət və qayğının dövlət siyasətinin əsas istiqamətlərindən biri kimi müəyyənləşdirilməsi ulu öndərimiz Heydər Əliyevin adı ilə bağlıdır. Ümummilli Liderimiz ölkəmizə rəhbərliyinin bütün dövrlərində uşaqların təhsilinə, dünyagörüşlərinin zənginləşdirilməsinə və sağlamlıqlarının qorunmasına xüsusi diqqət yetirib.
Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, bu sözləri Naxçıvan şəhərində yerləşən Heydər Əliyev Uşaq-Gənclər Yaradıcılıq Mərkəzində Ümumdünya Uşaq Günü ilə əlaqədar keçirilən tədbirdə komitənin sədri Ramilə Seyidova deyib.
Ramilə Seyidova bildirib ki, Ulu Öndərin rəhbərliyi ilə uşaq hüquqları sahəsində qanunvericilik bazası yaradılıb, ölkəmiz uşaqlarla bağlı beynəlxalq konvensiyalara qoşulub. Bu gün dövlət uşaq siyasəti Azərbaycan Respublikasının Prezidenti İlham Əliyev tərəfindən uğurla davam etdirilir.
Diqqətə çatdırılıb ki, Naxçıvan Muxtar Respublikasında da uşaqlar dövlət qayğısı ilə təmin edilir, onların təhsili, sağlamlıqlarının qorunması, istedadlarının üzə çıxarılması, intellektual və mənəvi inkişafı, asudə vaxtının və tərbiyəsinin düzgün təşkili, cəmiyyətin ictimai-mədəni həyatındakı iştiraklarını təmin etmək məqsədilə mühüm tədbirlər keçirilir.
Ramilə Seyidova qeyd edib ki, bu gün muxtar respublika əhalisinin 35,80 faizi və ya 165 min 652 nəfəri uşaqlardır. Hazırda muxtar respublikada 11293 uşaq idmanla məşğul olur, onlar idmanın müxtəlif sahələri üzrə ölkədaxili və beynəlxalq yarışların mükafatçısı və qalibi adını qazanırlar. Uşaqların qanunvericiliklə müəyyən edilmiş hüquq və mənafelərinin qorunması istiqamətində görülən işlərin davamı olaraq cari ilin ötən dövründə 26 uşaq müəssisəsində monitorinqlər aparılıb. Bundan əlavə, uşaq hüquqlarının həyata keçirilməsinə dair elektron məlumat bankı təşkil olunub, indiyədək 36 mindən artıq uşaq haqqında fərdi məlumatlar banka daxil edilib. Həmçinin ailələrdə himayə və qəyyumluqda yaşayan uşaqlara, valideynlərini itirmiş və valideyn himayəsindən məhrum olmuş, sağlamlıq imkanı məhdud, şəhid və xüsusi qayğıya ehtiyacı olan ailələrin uşaqlarına bayram günlərində və tədbirlərdə hədiyyə və sovqatlar verilib. Hər il Bilik Günü ilə əlaqədar müvafiq uşaqlar məktəbli paltarı, dərs ləvazimatları ilə təmin olunub.
Qeyd edilib ki, Ali Məclisi Sədrinin 2021-cı il 15 mart tarixli Sərəncamı ilə təsdiq edilmiş “2021-2025-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası da nəzarətdə saxlanılıb, cari ildə 51 sağlamlıq imkanları məhdud uşaq məktəb, məktəbəqədər, məktəbdənkənar və müalicə reabilitasiya müəssisələrinə, cəlb olunub. Eyni zamanda, Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən muxtar respublikada sağlamlıq imkanları məhdud uşaqların tarixi abidələrə və muzeylərə ekskursiyaları təşkil edilir, yaradıcı uşaqların üzə çıxarılması məqsədilə müsabiqələr keçirilir, rəsm və əl işlərindən ibarət sərgi və sərgi-satışlar təşkil edilir. Onların Ağbulaq İstirahət Mərkəzində istirahətləri təşkil olunur.
“Muxtar respublikada dövlət uşaq müəssisələrində valideynləri tərəfindən tərk edilmiş, məktəbdən yayınan, hüquq pozan cinayət məsuliyyətinə cəlb olunmuş uşaq yoxdur”, - deyən komitə sədri muxtar respublikada uşaqlara göstərilən diqqət və qayğıya görə Naxçıvan Muxtar Respublikası Ali Məclisinin Sədri Vasif Talıbova dərin minnətdarlığımı bildirib.
Naxçıvan Muxtar Respublikasının Təhsil naziri Rəhman Məmmədov çıxışında muxtar respublikada uşaqların təhsilinə, sağlamlıqlarına, təlim-tərbiyəsinə, asudə vaxtlarının səmərəli təşkilinə mühüm önəm verildiyini vurğulayıb. Nazir hazırda muxtar respublikada 53028 şagirdin təhsil aldığını, bu günədək 200-dən çox təhsil müəssisəsinin yenidən tikilərək istifadəyə verildiyini diqqətə çatdırıb. Bildirib ki, təhsilə göstərilən diqqət və qayğının nəticəsidir ki, ötən il məzunlardan 3 nəfəri Prezident təqaüdünə layiq görülüb. Rəhman Məmmədov uşaqların istedadlarının üzə çıxarılması məqsədi ilə görülən tədbirlərdən ətraflı bəhs edib.
Muxtar respublikada həyata keçirilən uğurlu dövlət uşaq siyasəti haqqında danışan Naxçıvan Muxtar Respublikasının Mədəniyyət naziri Natəvan Qədimova bu sahədə möhkəmləndirilmiş qanunvericilik bazası və qəbul olunan normativ hüquqi aktların əhəmiyyətinə toxunub. Natəvan Qədimova uşaqların bacarıq və istedadlarının üzə çıxarılması istiqamətində nazirlik tərəfindən atılan addımlar və həyata keçirilən tədbirlər haqqında ətraflı danışıb. Qeyd edib ki, muxtar respublikada Naxçıvan Dövlət Uşaq Filarmoniyası, Naxçıvan Dövlət Uşaq Teatrı, Naxçıvan Muxtar Respublika Uşaq Kitabxanası, Naxçıvan Dövlət Kukla Teatrının fəaliyyət göstərməsi uşaqların istedadlarının üzə çıxarılmasında, bacarıqlarının inkişaf etdirilməsində böyük rola sahibdir.
Çıxış edənlər uşaqları əlamətdar gün münasibətilə təbrik ediblər.
Tədbirdə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən 2020-2021-ci ildə təhsil, idman, incəsənət nominasiyaları üzrə 18 uşağa diplom və hədiyyə təqdim olunub. Bədii hissədə Heydər Əliyev Uşaq-Gənclər Yaradıcılıq Mərkəzinin Gənc Heydərçilər dərnəyinin, Naxçıvan Dövlət Uşaq Filarmoniyasının mahnı və rəqs qruplarının, Naxçıvan şəhərindəki 11 nömrəli uşaq bağçasının balaca fidanlarının vətənpərvərlik mövzusunda çıxışları olub.
Qeyd edək ki, tədbir Naxçıvan Muxtar Respublikasının Təhsil və Mədəniyyət nazirlikləri və Ailə, Qadın və Uşaq Problemləri üzrə Dövlət Komitəsinin təşkilatçılığı ilə keçirilib.