Müzəffər Azərbaycan Ordusu ermənilərin törətdiyi soyqırımının bütün qurbanlarının qisasını layiqincə alıb
Bakı, 31 mart, AZƏRTAC
1918-ci ilin mart soyqırımı erməni xislətinin, onun vəhşiliyinin, amansızlığının ən bariz nümunəsidir. Son 200 ildə xalqımıza qarşı erməni millətçiləri tərəfindən məqsədyönlü şəkildə aparılan etnik təmizləmə, soyqırımı və təcavüzkar siyasət Azərbaycan tarixinin faciələrlə, o cümlədən qanlı hadisələrlə müşahidə olunan çox ağrılı mərhələlərini təşkil edir. Bu millətçi-şovinist siyasətin əsas məqsədi azərbaycanlıları öz tarixi torpaqlarından qovmaqla əzəli Azərbaycan ərazilərində ermənilərin uydurduqları “böyük Ermənistan” dövləti yaratmaq olub. Tarixi faktlar göstərir ki, XX əsrin əvvəllərində erməni millətçiləri Daşnaksütyun partiyasının proqramında irəli sürülən “böyük Ermənistan” xülyasını reallaşdırmaq istiqamətində fəaliyyətlərini genişləndirərək öz tarixi torpaqlarında yaşayan azərbaycanlıları planlı surətdə doğma yurdlarından qovmaqla etnik təmizləmə və soyqırımı siyasətini həyata keçirməyə başlayıblar. Bu mənada, 1918-ci ilin 31 mart soyqırımı erməni millətçilərinin planlı şəkildə həyata keçirdiyi növbəti vandalizm, barbarlıq aktlarından biri idi.
AZƏRTAC xəbər verir ki, bunu Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.
1918-ci il 31 mart soyqırımının ermənilərin xalqımıza qarşı həyata keçirdiyi ən genişmiqyaslı terror aktlarından biri kimi tarixə yazıldığını qeyd edən Sədaqət Vəliyeva bildirib: “Zaman-zaman azərbaycanlıları qətliama, soyqırımına və deportasiyaya məruz qoyan erməni millətçiliyi heç bir zaman əməlindən geri qalmayıb. Biz bunu 1992-ci ildə Xocalı soyqırımı zamanı da müşahidə etmişik. Eyni zamanda, 44 günlük Vətən müharibəsində də ermənilərin Gəncə, Bərdə, Mingəçevir və başqa yaşayış məntəqələrini raket zərbələrinə məruz qoyması, dinc insanları qətlə yetirməsi Ermənistanın xalqımıza qarşı tarixi soyqırımı siyasətindən imtina etmədiyini göstərir. Bu faktlar bir daha sübut edir ki, Ermənistan hər zaman olduğu kimi XXI əsrdə də məkrli niyyətlərini gerçəkləşdirmək üçün qeyri-insani üsul və vasitələrdən istifadə etməkdən belə çəkinmir, dünyanın gözü qarşısında soyqırımı siyasətini davam etdirməyə cəhd edir”.
Xalqımıza qarşı törədilmiş ağır cinayətlərə ümummilli lider Heydər Əliyevin “Azərbaycanlıların soyqırımı haqqında” 1998-ci il 26 mart tarixli Fərmanı ilə hüquqi-siyasi qiymət verildiyini deyən Sədaqət Vəliyeva əlavə edib ki, erməni-bolşevik silahlı dəstələrinin azərbaycanlılara qarşı törətdikləri bəşəri cinayətlər barədə həqiqətlərin ölkə və dünya ictimaiyyətinə daha dolğun çatdırılması məqsədilə Azərbaycan Prezidenti İlham Əliyevin “1918-ci il azərbaycanlıların soyqırımının 100 illiyi haqqında” Sərəncamı erməni vəhşiliyinin ifşası baxımından xüsusi əhəmiyyət kəsb edib.
Deputat diqqətə çatdırıb ki, Azərbaycan xalqı tarix boyu üzləşdiyi bütün faciələrə, soyqırımlara baxmayaraq, özünün müstəqillik əzmini qoruyub saxlayıb, yenilməz birlik və həmrəylik nümayiş etdirib, 44 günlük Vətən müharibəsi ilə ərazi bütövlüyünü bərpa edib. Müzəffər Ali Baş Komandanın rəhbərliyi ilə Azərbaycanın şanlı Ordusu ermənilərin törətdiyi soyqırımının bütün qurbanlarının qisasını alıb. Böyük Zəfərlə bütün şəhidlərimizin qisası düşməndən məhz döyüş meydanında alınıb.
Vurğulanıb ki, bütün beynəlxalq təşkilatlar, həmçinin dünyanın aparıcı dövlətləri Ermənistanın azərbaycanlılara qarşı törətdiyi tarixi soyqırımı siyasətini qınamalı, bu cinayətlərə görə onun hüquqi müstəvidə cəzalanmasını təmin etməlidir. Azərbaycan xalqına qarşı törədilən bu soyqırımları mahiyyət etibarilə insanlığa qarşı törədilən cinayətdir və bu cinayətə yol verənlərin cəzalanmasında bütün bəşəriyyət maraqlı olmalıdır. Eyni zamanda, Azərbaycan xalqına qarşı törədilmiş soyqırımı haqqında həqiqətlərin real faktlar əsasında dünya ictimaiyyətinə çatdırılaraq, saxta erməni təbliğatı nəticəsində formalaşmış yalan təsəvvürlərin dəyişdirilməsi bundan sonra da hər bir Azərbaycan vətəndaşının borcu olmalıdır.
Bölmənin digər xəbərləri
