Muzeydə “Şəhidlər yaşayır” mövzusunda anma mərasimi keçirilmişdir
Bakı, 18 yanvar (AZƏRTAC). Yanvarın 18-də Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində 20 Yanvar faciəsi qurbanlarının xatirəsinə həsr olunmuş “Şəhidlər yaşayır” mövzusunda anma mərasimi keçirilmişdir.
AZƏRTAC xəbər verir ki, uşaq incəsənət və orta məktəb şagirdlərinin də iştirak etdikləri tədbirin əsas məqsədi bugünkü və gələcək nəsilləri Vətən yolunda, milli azadlığımız uğrunda öz canlarını fəda etmiş şəhidlərimizi heç vaxt unutmamağa səsləməkdən ibarət olmuşdur.
Tədbirdə şəhidlərimizin əziz xatirəsi bir dəqiqəlik sükutla yad edilmişdir.
Muzeyin elmi katibi Fəridə Quliyeva faciədən artıq 23 il keçdiyini, 20 Yanvar - Ümumxalq Hüzn Gününün Azərbaycan xalqının tarixinə qanlı hərflərlə yazıldığını bildirmişdir. Həmin qanlı gecədə həlak olan vətənpərvər övladların xalqımızın tarixində əbədi iz qoyduqları, şəhidlik zirvəsinə ucaldıqları qeyd etmişdir.
Anma mərasimində 48 nömrəli Füzuli qaçqın, 162 nömrəli orta və 2 nömrəli uşaq incəsənət məktəblərinin şagirdlərinin 20 Yanvar faciəsini əks etdirən rəsm əsərlərindən ibarət sərgi nümayiş olunmuş, onların ifasında şeirlər və həzin musiqilər təqdim edilmişdir.
Bölmənin digər xəbərləri
