Myanmada buddist festivalına bomba atılması nəticəsində azı 24 nəfər ölüb
Bakı, 8 oktyabr, AZƏRTAC
Myanma hərbi xunta hökumətinə qarşı etiraz aksiyası zamanı motorlu paraplanerin buddist festivalına toplaşan kütlənin üzərinə iki bomba atması nəticəsində azı 24 nəfər ölüb, 47 nəfər yaralanıb. AZƏRTAC BBC telekanalına istinadla xəbər verir ki, hərbçilər Myanmanın mərkəzindəki Çaunq U qəsəbəsində milli bayram üçün toplaşan 100-ə yaxın adama hücum ediblər.
Ordunun 2021-ci ildə hakimiyyəti ələ keçirməsi, silahlı müqavimət qrupları və etnik milislərlə vətəndaş müharibəsinə səbəb olduqdan sonra Myanmada minlərlə insan həlak olub, milyonlarla insan didərgin düşüb. Ölkənin yarıdan çoxuna nəzarəti itirdikdən sonra ordu xüsusilə hava hücumları və ağır bombardman kampaniyası ilə yenidən əhəmiyyətli uğurlar əldə edir. Bazar ertəsi hücuma məruz qalan qəsəbə müharibədə əsas döyüş meydanı olan Saqainq bölgəsində yerləşir. Onun böyük bir hissəsi hərbi xuntaya qarşı döyüşmək üçün çevrilişdən sonra yaradılmış könüllü milislərin nəzarəti altındadır. Xalq Müdafiə Qüvvələri (PDF) kimi tanınan bu qruplar həm də yerli administrasiyanı idarə edirlər.
Myanmada 2021-ci il çevrilişindən sonra ilk ümumxalq səsverməsinin dekabr ayında keçirilməsi planlaşdırılır. Tənqidçilər deyirlər ki, seçkilər azad və ədalətli olmayacaq, həmçinin orduya ölkədə nəzarətsiz hakimiyyəti davam etdirməyə imkan verəcək.
Bölmənin digər xəbərləri
