MƏDƏNİYYƏT
Nailə Əliyeva: Blogerlərin insanlara və ölkəyə daha çox fayda vermələrini istərdim
![Nailə Əliyeva: Blogerlərin insanlara və ölkəyə daha çox fayda vermələrini istərdim](/files/2024/2/1200x630/17184303282434321346_1200x630.jpg)
Bakı, 15 iyun, Anara Axundova, AZƏRTAC
AZƏRTAC Azərbaycanın məşhur blogerləri ilə silsilə müsahibələrini davam etdirir. Budəfəki həmsöhbətimiz bloger, sahibkar, ictimai xadim, xeyriyyəçi Nailə Əliyevadır. Nailə xanım öz fəaliyyəti haqqında söz açıb, eləcə də ənənəmizə uyğun olaraq yeni başlayan blogerlərə məsləhətlər verib.
- Nailə xanım, blogerlik fəaliyyətiniz nədən başladı və bunun ayrıca fəaliyyət sahəsi olduğunu nə vaxt anladınız?
- Səhifəmin artıq on iki yaşı var və onun doqquz ilini mən demək olar ki, heyvanlar üçün açdığım salonda itlərin qırxılması postlarına həsr etmişəm. Həmin vaxtdan mənim səhifəmə təxminən 25 000-dən çox insan abunə olub. “Stories”də bəzən öz həyatımda baş verən hadisələr haqqında paylaşımlar etdiyim üçün bu reklam verənlərin diqqətini çəkdi. Mənim bu işə yanaşma və təqdim etmə tərzim onların xoşuna gəldi. Ona görə də, üç il əvvəl blogerlik işi ilə məşğul olmağımla bağlı təklif aldım. Mənim üçün bu baryeri keçmək, postlarda şəxsi həyatımı göstərməyə başlamaq çətin idi. Agentlər sözün birbaşa mənasında məni paylaşımlar etməyə az qala vadar edirdilər. Lakin vaxt keçdikcə başa düşürsən ki, nəyi ictimaiyyətə nümayiş etdirmək olar, nəyi əksinə, pərdə arxasında saxlamaq lazımdır.
- Siz bir neçə müxtəlif istiqaməti bir bloqda birləşdirməyə nail olmusunuz. Bunu necə edirsiniz?
- Mənim bloqum – mənim həyatımdır, yəqin ki, aktiv qadınların əksəriyyətində də belədir. Mən sadəcə olaraq, öz məişətim, hobbim, maraqlarım barədə paylaşımlar edirəm. Bu mənim həyatımın təbii axınıdır. Müxtəlif kateqoriyalara aid olan insanlar üçün çoxtərəfli və faydalı məlumatlar da məhz buradan qaynaqlanır.
- Necə düşünürsünüz, bloqunuzun uğur qazanmasının sirri nədədir?
- Səmimiyyətdə. Özün olmağı bacarmaq lazımdır. O zaman kontent uydurub tapmaq, publikaya oynamaq lazım gəlməyəcək. Əgər sizin həyat tərziniz kiməsə maraqlı gəlsə, o sizin səhifəyə abunə olacaq. Həmçinin parlaq, cəmiyyət üçün faydalı olmaq və ən başlıcası, öz auditoriyanı reklamla aldatmamaq lazımdır.
- Fəaliyyətinizin bir qədər də digər hissəsi barədə söz açın. Siz həm də heyvanların xilas edilməsi ilə məşğul olursunuz. Bloq sizə bu işdə köməklik edirmi?
- Səhifəmə abunə olanların demək olar hamısı heyvanları sevirlər, həm də mən ancaq özümün xoşuma gələn paylaşımları etməyə üstünlük verirəm, heç kimin istəyinə uyğun hərəkət etmirəm. Ona görə də, səhifəmə daha çox mənimlə eyni fikirdə olanlar abunə olurlar. İtlərlə bağlı paylaşımlar daha az baxış toplayır, lakin mənim üçün vacib olan statistika deyil. Abunəçilər hər zaman paylaşdığım xeyriyyə aksiyalarına məmnuniyyətlə qoşulurlar, çünki onlar bilirlər ki, yığılan vəsait son qəpiyinə qədər ünvanına çatacaq.
- Gəlin, bir az da biznesiniz haqqında danışaq. Sizin itlər üçün salonunuz var. Necə düşünürsünüz, uğurunuzun sirri nədədir?
- Bu işə 2012-ci ildən başlamışam və bu sahədə ən birinci sayılıram. Uğurun səbəbi heyvanlara sevgidir. Bütün kollektivimiz də heyvanları çox sevir. Yalnız pula görə işləmək üçün gələnlərlə dərhal vidalaşmalı oluram. Salonumdakı kollektiv vahid ailədir, biz bu kollektivdə qarşılıqlı anlaşma və bərəbarhüquqluluğu qoruyub saxlayırıq. Bu da təcrübə ilə qazanılan nailiyyətdir.
- Bloger özünü bizim ölkədə necə hiss edir? Onun hansı imkanları və perspektivləri var?
- Blogerin üstünlükləri çoxdur. O, vacib informasiya axınının ruporu sayılır. Ona görə də, nə dediyinə, nə etdiyinə diqqət yetirməlisən. Bununla yanaşı, digər müsbət cəhətlər də mövcuddur: sən maraqlı tədbirlərə, konsertlərə, özəl və dövlət tədbirlərinə əlçatanlıq imkanı əldə edirsən, sənə müəyyən xidmətləri artıq pulsuz şəkildə təqdim etməyə çalışırlar. Burada artıq işin qalan hissəsi sənin öz vicdanından asılıdır: sən bu xidmətlərə görə haqq ödəyirsən, ya ödəmirsən, sənə bayramlarda hədiyyələr göndərirlər. Qlobal üstünlüklərə isə bunları aid edə bilərəm: sən xeyriyyə aksiyalarında iştirak edirsən, insanlara və heyvanlara kömək edirsən, sosial çarxlarda çəkilirsən. Bir qayda olaraq, onlara görə heç bir ödəniş təqdim edilmir, özün də heç pul almağı ağlından keçirmirsən! Öz ölkən üçün faydalı ola biləcəyini dərk edəndə bu sadəcə olaraq, sənə böyük qürur hissi verir. Məşhur əcnəbi blogerlərə gəldikdə, mən onlardan nümunə götürməyə çalışmıram, onlar buna iş kimi baxırlar. Mənim üçün isə bu, sadəcə olaraq, hobbidir, mən onları izləmirəm və deyə bilərəm ki, heç trendlə də ayaqlaşa bilmirəm. Mənim buna heç vaxtım da yoxdur. Mən ancaq öz kontentimi yükləyirəm, vəssalam.
- Sizin fikrinizcə, yaxın onillik ərzində bloqinq necə inkişaf edəcək, bu işlərin axırı hara gedir? Sadəcə bir bloqa bel bağlamaq olarmı? Yoxsa bloqinqi hər hansı başqa bir fəaliyyətlə birləşdirmək daha məqsədəuyğun olar?
- Yaxşı sualdır. Əgər buna sadəcə iş kimi yanaşsaq, bloqdan yaxşı qazanc əldə etmək mümkündür. Bu iş vaxtın demək olar ki, böyük bir hissəsini alır, ona görə də, dərhal əlavə hər hansı digər fəaliyyətlə məşğul olmaq mümkün olmur. Əgər sizin başqa bir işiniz varsa, onda tam şəkildə bloger fəaliyyəti ilə məşğul ola və istədiyiniz məbləği qazana bilməyəcəksiniz. Mən hər şeydən əvvəl populyar olmağı məsləhət görürəm. Sizin yaxşı və böyük auditoriyanız yarandıqdan sonra isə bundan əlbəttə ki, faydalanmaq və biznes açmaq olar. Çünki sizin bloqunuz əsl pulsuz reklam deməkdir və biznesiniz burada əməlli-başlı çiçəklənə bilər. On ildən sonra nə olacağını deyə bilmərəm. Hər şey çox sürətlə dəyişir. Ancaq istərdim ki, blogerlər insanlara və ölkəyə daha çox fayda versinlər.
- Yeni başlayan blogerlərə və blogerlik etmək istəyənlərə nə məsləhət verə bilərsiniz?
- Bloger olmağa başlamazdan əvvəl mütləq bloqun idarə edilməsi üzrə kurs keçmək lazımdır. Mütləq! İndi sosial şəbəkələrin alqoritmlərinin öz tələbləri var. Video və fotoşəkillər əla keyfiyyətdə olmalıdır. Videonu nə vaxt və saat neçədə yükləmək lazım olduğunu bilmək lazımdır. Hər dəfə yeniliklər və dəyişikliklər baş verir. Bütün bunlar olmadan işə başlamağa belə dəyməz. Bu işə olduqca ciddi yanaşmaq lazımdır, yoxsa heç bir nəticə gözləməyə dəyməz.
- Nailə xanım, ən sonda gəlin, sizinlə kiçik bir eksperiment aparaq. Təsəvvür edin ki, mən sizin yanınıza ekspert məsləhəti almağa gəlmişəm. Necə düşünürsünüz, hansı it mənə daha uyğun gələr?
- Qoy bir fikirləşim… (Məni başdan-ayağa süzür) Mənə elə gəlir ki, sizə levret daha uyğun olar. Levret cinsindən olan it həm nazlıdır, həm də evdə qalmağı sevir, üstəlik, bayırda gəzib-dolanmaq da onun xoşuna gəlir. O, cazibədar və parlaqdır.
- ...Nə üçünsə əmin idim ki, siz mənə çixuaxuanı məsləhət görəcəksiniz!
- Yox, yox! Çixuaxua qətiyyən sizlik deyil (gülür). Bu itlər isə əsilzadədirlər.
- Çox sağ olun, Nailə xanım! Bu böyük komplimentdir.