“Naxçıvanpoçt” publik hüquqi şəxsinin internet səhifəsi yenilənib
Naxçıvan, 15 aprel, AZƏRTAC
Naxçıvan Muxtar Respublikası Rabitə və Yeni Texnologiyalar Nazirliyi tərəfindən “Naxçıvanpoçt” publik hüquqi şəxsinin internet səhifəsi müasir üslubda hazırlanaraq yenilənib.
Nazirlikdən AZƏRTAC-ın Naxçıvan bürosuna bildirilib ki, istifadəyə verilən saytda əsas məqsəd “Naxçıvanpoçt” tərəfindən göstərilən xidmətlərin, habelə onun fəaliyyətinin ayrı-ayrı istiqamətləri üzrə istifadəçilərin rahatlığını təmin etmək və müasir tələblərə uyğunlaşdırmaqdır.
Yenilənmiş sayt (www.naxcivanpoct.az) həm dizayn, həm də məzmun cəhətdən əvvəlki versiya ilə müqayisədə daha da təkmilləşdirilərək yeni informasiyalarla zənginləşdirilib, istifadəçi rahatlığını təmin etmək üçün daha müasir proqram təminatlarından istifadə olunub, funksionallığı artırılıb və sayta yeni modullar əlavə edilib.
Portal, ümumilikdə, 5 bölmə və 8 altbölmədən ibarətdir. Əsas səhifədə “Naxçıvanpoçt” publik hüquqi şəxsinin patentli loqosu, fotomateriallarından ibarət slayd, keçirilən tədbirlərə dair materiallar, həmçinin Naxçıvanın görüntülərini əks etdirən fotoqalereya və faydalı linklər üçün bannerlər yerləşdirilib. Həmçinin istifadəçilərin rahatlığının təmin olunması məqsədilə “Naxçıvanpoçt” publik hüquqi şəxsinin ünvanı, əlaqə telefonları və elektron poçt ünvanı yerləşdirilib.
“Naxçıvanpoçt” publik hüquqi şəxsi tərəfindən itirilmiş əşyaların qəbulu və təhvili xidməti də fəaliyyət göstərir. Bu xidmətlə vətəndaşlar hər hansı bir yerdə kimə məxsus olduğunu bilmədikləri, itmiş hesab olunan əşyalar tapdıqda muxtar respublikada fəaliyyət göstərən ən yaxın poçt bölməsinə təhvil verə bilərlər. Buraya “Naxçıvanpoçt” publik hüquqi şəxsi və rayon filialları, eyni zamanda, kəndlərdəki poçt bölmələri də daxildir. “İtirilmiş əşyaların sahibinə çatdırılması xidməti” üçün internet saytında xüsusi bölmə yaradılıb. Bununla yanaşı, elektrik enerjisi, mavi yanacaq, sudan istifadə haqları və internet ödənişlərinin bu portal üzərindən onlayn aparılması da mümkündür.
Saytın istifadəyə verilməsi muxtar respublikada poçt rabitəsi xidmətinin səviyyəsinin yüksəldilməsinə, muxtar respublika sakinlərinin nümunəvi poçt rabitəsi xidmətləri ilə təmin olunmasına öz töhfəsini verəcək.
Bölmənin digər xəbərləri
