Nazir: Böyük Britaniya Azərbaycan və Ermənistanla münasibətləri strateji tərəfdaşlıq səviyyəsinə yüksəldəcək
London, 14 oktyabr, AZƏRTAC
Böyük Britaniya hökuməti Azərbaycana və Ermənistana silah tədarükünə tətbiq edilən embarqonu tam şəkildə ləğv etmək qərarına gəlib.
AZƏRTAC xəbər verir ki, bu barədə Birləşmiş Krallığın Avropa, Şimali Amerika və dənizaşırı ərazilər üzrə dövlət naziri Stiven Dauti bildirib.
Nazirin açıqlamasında Cənubi Qafqazda sülh prosesində əldə olunan tarixi irəliləyişlərə istinad edilib. O deyib ki, avqustun 8-də Vaşinqtonda ABŞ Prezidenti Donald Trampın ev sahibliyi ilə keçirilmiş üçtərəfli sülh sammiti çərçivəsində Azərbaycan Prezidenti İlham Əliyev və Ermənistanın Baş naziri Nikol Paşinyan arasında sülh sazişi paraflanıb və Birgə Bəyannamə imzalanıb.
Bu Bəyannamədə ATƏT-in Minsk qrupunun fəaliyyətinin dayandırılması, eləcə də Ermənistanın suverenliyinə hörmət edilməklə Azərbaycanın Naxçıvanla maneəsiz nəqliyyat əlaqəsinin təmin olunması barədə razılığa gəlinib. Böyük Britaniya tərəfi bu addımı Cənubi Qafqazda davamlı sülh və sabitlik üçün dönüş nöqtəsi kimi qiymətləndirib.
Nazir Dauti diqqətə çatdırıb ki, əldə olunan irəliləyişləri nəzərə alaraq, London Azərbaycan və Ermənistanla münasibətləri strateji tərəfdaşlıq səviyyəsinə yüksəldəcək. Yeni tərəfdaşlıq çərçivəsində ticarət, təhlükəsizlik və müdafiə sahələrində əməkdaşlıq gücləndiriləcək, nazirlər səviyyəsində illik görüşlər keçiriləcək. “Vaşinqton Sammitinin tarixi nəticələrini və Cənubi Qafqazda sülhün irəliləməsini nəzərə alaraq, 1992-ci ildə ATƏT tərəfindən tövsiyə olunan silah embarqosunun əsasları artıq mövcud deyil. Bu səbəbdən Böyük Britaniya Ermənistana və Azərbaycana tətbiq olunan silah embarqosunu tam şəkildə ləğv edəcək”, - deyə o bildirib.
Vurğulanıb ki, bu qərar Böyük Britaniyanın hər iki ölkə ilə təhlükəsizlik və müdafiə tərəfdaşlığını yeni mərhələyə daşıyacaq, onların suverenliyinin və ərazi bütövlüyünün qorunmasına dəstək verəcək.
Nazir, həmçinin bildirib ki, silah ixracı ilə bağlı bütün lisenziyalar fərdi qaydada və ciddi qiymətləndirmə meyarlarına əsasən veriləcək, bölgədəki vəziyyət isə daimi nəzarətdə saxlanılacaq.
Sonda S. Dauti qeyd edib ki, Böyük Britaniya, ABŞ, Avropa İttifaqı və digər tərəfdaşlarla birlikdə Cənubi Qafqazda sülh, təhlükəsizlik və rifahın möhkəmlənməsi üçün fəal rol oynamağa hazırdır.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
