-Möhtərəm cənab Prezident!

Bu gün neftçalalıların sevincinin həddi-hüdudu yoxdur. Bizim əsil iftixar və güvənc yerimizə çevrilmiş ümummilli liderimiz Heydər Əliyevin abidə kompleksi və muzeyi qarşısında Sizi salamlayır və Sizə hesabat veririk. Təməli ulu öndərimiz Heydər Əliyev tərəfindən qoyulmuş sosial-iqtisadi inkişaf ölkənin hər bir bölgəsində olduğu kimi, Neftçala rayonunda da uğurla davam edir. Böyük iftixar və fərəh hissi ilə Sizə məlumat verirəm ki, ölkənin ahəngdar inkişafını uğurla təmin edən, dəqiq hesablanmış regionların sosial-iqtisadi inkişafı Dövlət Proqramında Neftçala rayonu üzrə həlli nəzərdə tutulmuş 16 tədbirin hamısı müvəffəqiyyətlə yerinə yetirilmişdir. Bu Sizin ardıcıl surətdə apardığınız siyasətin təntənəsi və rayonumuza göstərdiyiniz qayğının bəhrəsidir.

Magistral yollardan kənarda yerləşən Neftçala rayonu indi yeni inkişaf dövrünə qədəm qoymuş, öz simasını dəyişərək abad bir diyara çevrilmişdir. Son illər rayonda kənd təsərrüfatı, sənaye istehsalı artmış, 44 yeni müəssisə yaradılmış, 769 fiziki şəxs sahibkarlıq fəaliyyətinə başlamış, 6131 yeni iş yeri açılmışdır ki, onlardan da 2816-sı daimi iş yerləridir. Keçmiş sovetlər məkanında yeganə olan, uzun illər fəaliyyətsiz qalmış Neftçala yod-brom zavodu sahibkarlığın inkişafına verdiyiniz hərtərəfli dəstək nəticəsində qısa müddətdə yenidən qurularaq işə salınmış, məhsul istehsalına başlanmışdır. Zavodun fəaliyyəti tam bərpa edildikdən sonra orada yenidən 500 ton yod istehsal ediləcək, 500 nəfər işlə təmin olunacaqdır. Son illər istifadəyə verilmiş pullu nərə balıqartırma zavodunda axırıncı bir ildə 8 milyon 250 min balıq körpəsi yetişdirilərək Xəzər dənizinə buraxılmışdır. Zavodun balıq konservi istehsal edən sahələrinin istifadəyə verilməsi üçün də tədbirlər nəzərdə tutulur.

Regionların sosial-iqtisadi inkişafı Dövlət Proqramında nəzərdə tutulmuş tədbirlərin həyata keçirilməsi nəticəsində rayonun iqtisadiyyatının əsasını təşkil edən kənd təsərrüfatında məhsul istehsalı əvvəlki ilə nisbətən 18 faiz artmışdır. Sizin aqrar sahədə ardıcıl həyata keçirdiyiniz tədbirlər növbəti illərdə artımın saxlanılacağına ən etibarlı təminatdır. Kənd təsərrüfatı məhsulları istehsalçılarına dövlət dəstəyi haqqında 2007-ci il 23 yanvar tarixli Sərəncamınız bu sahədə çalışanlara böyük maliyyə dəstəyi olmuş, aqrar sahənin inkişafına geniş imkanlar açmışdır. 24 min nəfər əhalisi, 18 min hektar əkin sahəsi olan, “Xol zonası” adlanan ərazinin suvarma suyu ilə təminatını yaxşılaşdırmaq üçün regionların sosial-iqtisadi inkişafı Dövlət Proqramında nəzərdə tutulmuş, uzunluğu 25 kilometr, ümumi dəyəri 31 milyon manat olan Neftçala magistral su kanalının Sizin qayğınız, yaxından köməyiniz nəticəsində tikintisinə ötən ilin axırlarında başlanılmışdır.

Kənd adamlarının böyük sevincinə və razılığına səbəb olan həmin kanalın tikintisində işlər bu gün sürətlə davam etdirilir. Yeni kanal tam işə salındıqdan sonra ərazidə yaşayan əhalinin həyat tərzi və güzəranı daha da yaxşılaşacaq, kənd təsərrüfatı məhsullarının istehsalı sürətlə artacaqdır.

Möhtərəm cənab Prezident, bilavasitə tövsiyəniz və tapşırığınız əsasında rayonda abadlıq və quruculuq işləri geniş vüsət almışdır. Sizin göstərişiniz əsasında ayrılmış vəsait hesabına küçə və yollara 70 min kvadratmetrdən çox asfalt, səkilərə 9 min kvadratmetrdən çox üzlük piltə döşənmiş, yol kənarlarında 3 kilometrdən artıq məsafədə hasarlar çəkilmiş, yaşayış binalarının fasadları təzələnmiş, 5 kilometrlik məsafədə yeni işıqlandırma sistemi quraşdırılmışdır. Qısa müddət ərzində şəhərdə 3 yeni bağ salınmış, sahəsi 3 hektardan çox olan Hüseyn Cavid parkı əsaslı təmir edilərək neftçalalıların istifadəsinə verilmişdir.

Ötən dövrdə şəhərin su təsərrüfatı və kanalizasiya sisteminin yenidən qurulması istiqamətində də xeyli iş görülmüşdür.

Sizin və Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı, çox hörmətli Mehriban xanım Əliyevanın diqqət və qayğısı nəticəsində son iki ildə 3 orta məktəb binası, Qarabağ müharibəsi ailələri və şəhid ailələri üçün 24 mənzilli yaşayış binası tikilib istifadəyə verilmiş, rayon mədəniyyət və incəsənət sarayı, şahmat məktəbi əsaslı təmir olunmuşdur. Cari ildə Qarabağ müharibəsi əlilləri və şəhid ailələri üçün 24 mənzilli daha bir yaşayış binasının tikintisinə başlanmışdır. Hazırda rayonumuzun 8 orta məktəbində əsaslı təmir işləri davam etdirilir.

Hörmətli cənab Prezident, məlumat verim ki, qəza vəziyyətində olan məktəblərin əsaslı təmir edilməsi ilə bağlı vəsaitin ayrılması barədə imzaladığınız Sərəncamdan dərhal sonra Neftçala şəhər 2 nömrəli orta məktəbinin təmirinə başlanmış və hazırda işlər sürətlə davam etdirilir. İcazə verin, rayonumuzun təhsil sahəsinə göstərdiyiniz qayğıya görə neftçalalıların minnətdarlığını, rəğbətini və məhəbbətini Sizə çatdırım.

Möhtərəm cənab Prezident, fürsətdən istifadə edərək əhalimizi daha çox narahat edən bir problemi Sizin yüksək diqqətinizə çatdırmaq istərdim. Hələ keçən əsrin 50-ci illərində rayonun ərazindəki quyulardan çıxan səmt qazı tənzimlənmədən, təmizlənmədən və təzyiqi artırılmadan birbaşa borulara vurularaq əhaliyə verilmişdir. Eyni zamanda, 18 kilometr uzunluğu olan yeraltı xəttin 13 kilometrlik hissəsinin borularının nasazlığı ucbatından qazın çox hissəsi uzun illər ərzində itkiyə gedir. “Azəriqaz” Səhmdar Cəmiyyəti tərəfindən bu sahədə müəyyən işlər görülsə də, həmin boru xəttinin dəyişdirilməsinə, eyni zamanda qaz yatağına yaxın yaşayış məntəqələrinin qazlaşdırılmasına böyük ehtiyac duyulur.

Möhtərəm cənab Prezident, Sizin bölgələrə səfərləriniz, regionların sosial-iqtisadi inkişafı Dövlət Proqramının icrasına şəxsən nəzarət etməyiniz, sahibkarlığın inkişafı, işsizliyin aradan qaldırılması, yoxsulluğun azaldılması, iqtisadi və sosial layihələrin reallaşdırılması sahəsində gördüyünüz tədbirlər Neftçala rayonunun da sürətli inkişafına təkan vermişdir. Hər bir neftçalalı bu inkişafı bu gün öz gündəlik həyatında hiss edir və buna görə də Sizə minnətdardır.

Sizin rayonumuza bugünkü tarixi səfəriniz də qüvvəmizi qat-qat artırır, bizi yeni uğurlara ruhlandırır. Bu iftixar və fəxr dolu anları biz neftçalalılara bəxş etdiyinizə görə Sizə hədsiz minnətdarlığımızı bildirir və Neftçalanın bütün əhalisi adından Sizi, möhtərəm cənab Prezident, bir daha əmin edirəm ki, qarşımıza qoyduğunuz bütün vəzifələrin öhdəsindən layiqincə gələcək, verdiyiniz tapşırıqları çox böyük məsuliyyətlə yerinə yetirəcəyik.

X  X  X

Azərbaycan Prezidenti İlham Əliyev görüşdə nitq söylədi.

X  X  X

Sonra Prezident İlham Əliyev sakinlərlə səmimiyyətlə görüşüb söhbət etdi. Neftçalalılar dövlətimizin başçısına təşəkkürlərini bildirdilər, ölkəmizin sosial-iqtisadi inkişafı sahəsində qazanılan uğurlardan məmnunluqlarını ifadə etdilər. Onlar xalqımızın ümummilli lideri Heydər Əliyevin tarixi xidmətlərini xatırlayaraq, ulu öndərin müasir Azərbaycanın inkişafı üçün gördüyü işləri yüksək dəyərləndirdilər, onun apardığı siyasətin bu gün də uğurla davam etdirildiyini diqqətə çatdırdılar. Neftçalalılar Prezident İlham Əliyevin bütün fəaliyyətini ürəkdən dəstəklədiklərini bildirdilər.