NEFTÇALA RAYONU İCTİMAİYYƏTİNİN NÜMAYƏNDƏLƏRİ İLƏ GÖRÜŞDƏ AZƏRBAYCAN PREZİDENTİ İLHAM ƏLİYEVİN NİTQİ
-Əziz neftçalalılar! Əziz dostlar!
Mən sizin hamınızı ürəkdən salamlayıram. Bu gün Heydər Əliyev muzeyinin açılışı münasibətilə sizi ürəkdən təbrik edirəm. Muzeydə əks olunan eksponatlar ulu öndərin həyat və fəaliyyətini göstərir. Həm 1970-ci illərdə Azərbaycana rəhbərlik etdiyi dövrdə, həm də müstəqillik dövründə ulu öndər Heydər Əliyev həmişə öz xalqına sədaqətlə xidmət etmişdir. O illərdə və 1990-cı illərdə Azərbaycanın hərtərəfli inkişafı üçün, iqtisadi və siyasi potensialının qaldırılması üçün əlindən gələni əsirgəmirdi. 1979-cu ildə Heydər Əliyevin Neftçalaya səfəri də bu muzeydə xüsusi yer tutur. Rayonun o vaxtkı inkişafına çox böyük diqqət göstərilirdi. Burada böyük quruculuq-abadlıq işləri aparılırdı, sənaye müəssisələri, kənd təsərrüfatı inkişaf edirdi.
Əfsuslar olsun ki, 1990-cı illərin əvvəllərində baş vermiş 
xoşagəlməz proseslər ölkəmizə, o cümlədən Neftçalaya da böyük ziyan vurmuşdur. O vaxt Azərbaycan faktiki olaraq öz iqtisadi gücünü itirmişdi. Müəssisələr dayanmışdı, kənd təsərrüfatı tənəzzül edirdi, insanların həyat səviyyəsi gündən-günə pisləşirdi. Ölkəmizin, ümumiyyətlə, müstəqil ölkə kimi yaşaması sual altında idi. Biz o illəri çox yaxşı xatırlayırıq.
Müstəqilliyimizin ilk illəri əfsuslar olsun ki, Azərbaycanda çox ağır şəraitdə keçdi. Bunun nəticəsində də ölkəmizin torpaqları işğal olundu, vətəndaş qarşıdurması baş verdi. Bütövlükdə Azərbaycanın iqtisadi və siyasi potensialı çox böyük dərəcədə aşağı düşdü. Amma baxın, bu gün Azərbaycan dünyanın ən sürətlə inkişaf edən ölkələrindən biridir. Bu gün ulu öndərin zəhməti və fəaliyyəti nəticəsində Azərbaycan çox sürətlə inkişaf edir.
Bu inkişafın təməli 1990-cı illərin ortalarında qoyulmuşdur. 1993-cü ildən başlayaraq 2003-cü ilə qədər 10 il ərzində Heydər Əliyevin yorulmaz fəaliyyəti nəticəsində ölkəmiz o ağır, çətin şəraitdən şərəflə çıxa bilmişdir, öz siyasi potensialını gücləndirmişdir. İqtisadiyyatda başlanmış islahatlar insanların həyat səviyyəsinə böyük dərəcədə müsbət təsir göstərmişdir. Bu gün Azərbaycan beynəlxalq miqyasda çox önəmli bir ölkəyə çevrilmişdir.
Bizim təşəbbüslərimiz, irəli sürdüyümüz təkliflər nəinki Azərbaycana yeni imkanlar yaradır, həm də beynəlxalq münasibətlərə öz təsirini göstərir. Biz bölgədə aparıcı dövlətə çevrilmişik. Bu, artıq reallıqdır. Reallıq hamı tərəfindən qəbul olunub. Bizim qərarlarımız, bizim işlərimiz bütün bölgəyə öz təsirini göstərir. Biz də istəyirik ki, Azərbaycan daha da qüdrətli dövlətə çevrilsin. Bizim imkanlarımız daha da artsın, siyasi çəkimiz artsın, beynəlxalq müstəvidə istədiyimizə nail ola bilək, öz doğma torpaqlarımızı işğalçılardan azad edə bilək və Azərbaycan xalqının normal, yaxşı yaşamasını təmin edə bilək. Bunu etmək üçün Azərbaycan güclənməlidir. Bu proses artıq baş verir.
Mən bayaq qeyd etdim ki, dünyada ən sürətlə inkişaf edən iqtisadiyyat məhz Azərbaycandadır.
Düzdür, işsizliklə bağlı mübarizədə böyük uğurlar əldə etmişik, amma işsizlik tam şəkildə aradan qaldırılmayıb. Yoxsulluq 3 il ərzində 49 faizdən 20 faizə düşübdür. Çox böyük göstəricidir. Amma bizi tam qane edə bilməz. Halbuki, hətta inkişaf etmiş ölkələrdə əhalinin müəyyən hissəsi yoxsulluq şəraitində yaşayır. Amma mən istəyirəm ki, Azərbaycanda yoxsul təbəqə olmasın, mən istəyirəm ki, işsiz olmasın, işləmək istəyən işlə təmin olunsun, maaşlar yüksək olsun, pensiyalar imkan versin ki, insanlar normal yaşasınlar. Mən bunu istəyirəm və biz bu istiqamətdə gedirik. Hələ ki, bugünkü sosial məsələlərin həlli məni tam şəkildə qane edə bilməz. Amma əgər dinamikaya baxsaq, görərik ki, son 3-4 il ərzində böyük bir yol keçmişik. Növbəti illərdə, ildən-ilə minimum əmək haqları qaldırılacaq, pensiyalar qaldırılacaq, büdcədən maliyyələşən bütün təşkilatlarda çalışan insanların əmək haqları qaldırılacaq ki, büdcə təşkilatlarında işləyənlər tam şəkildə təmin olunsunlar.
O ki qaldı özəl sektora, burada da biz lazımi imkanlar yaradırıq. Hər il Azərbaycan büdcəsindən sahibkarlara 100 milyon dollar dəyərində kreditlər verilir. Artıq bir neçə ildir ki, bu kreditlər verilir və bu öz növbəsində yeni iş yerlərinin, müəssisələrin yaradılmasına gətirib çıxarır. Mən mütəmadi qaydada sahibkarlarla görüşürəm, onlara öz siyasi dəstəyimi verirəm. Yerli icra orqanlarına tapşırıq verirəm ki, onlara kömək olsunlar, onları dəstəkləsinlər.
Bu gün verilən məlumata görə, Neftçalada uzun illər fəaliyyətsiz qalmış yod-brom zavodu da fəaliyyətə başlamışdır. Bu, böyük bir müəssisədir, orada yüzlərlə insan çalışır və bundan sonra da çalışacaqdır. Orada istehsal olunan məhsul dünya bazarlarına çıxarılacaq və Neftçala da bundan xeyir götürəcək. Bununla bərabər, mərkəzləşmiş büdcədən ayrılan xərclər ildən-ilə artacaqdır ki, bütün məsələlər öz həllini tapsın.
Ona görə sahibkarlığın inkişafı bundan sonra da sürətlə getməlidir, kənd təsərrüfatının inkişafı üçün lazımi tədbirlər görülür, texnika alınır, aqrotexservislər yaradılır, “Aqrolizinq” fəaliyyət göstərir, fermerlərə maddi yardım göstərilir. Yəni biz çalışırıq ki, bütün sahələrdə qeyri-neft sektorunun inkişafına müxtəlif yollarla böyük təkan verək.
Mən əminəm ki, növbəti illərdə bu ardıcıl siyasətin, iqtisadi islahatların dərinləşməsi nəticəsində biz istədiyimizə nail olacağıq. Mən Azərbaycanın gələcəyini çox parlaq görürəm. Mən istəyirəm ki, Azərbaycan sözün əsl mənasında inkişaf etmiş ölkələrin sırasına daxil olsun. İstəyirəm insanlar yaxşı yaşasınlar, yaxşı maaş alsınlar, uşaqlar yaxşı məktəblərdə oxusunlar, xəstələr yaxşı tibbi xidmətə malik olsunlar, yollar abadlaşsın, şəhərlər gözəlləşsin, insanların üzü gülsün və Azərbaycan irəliyə getsin. Budur mənim arzularım!
Əminəm ki, siz bu arzuları bölüşürsünüz. Biz doğma Azərbaycanımızın inkişafı üçün bundan sonra da birlikdə işləyəcəyik, əlimizdən gələni edəcəyik və Azərbaycanı qüdrətli dövlətə çevirəcəyik. Sağ olun.
(Dövlətimizin başçısının nitqi böyük diqqətlə dinlənildi və dəfələrlə sürəkli alqışlarla qarşılandı).
Bölmənin digər xəbərləri
