“NEFTÇİ” AZƏRBAYCANIN MOSKVADAKI SƏFİRLİYİNİN QONAĞI OLMUŞDUR
AZƏRTAC-ın xüsusi müxbiri xəbər verir ki, Azərbaycanın Rusiyadakı səfiri Ramiz Rizayev yanvarın 19-da Ermənistanın “Pünik” komandası üzərində 2:0 hesabı ilə inamlı qələbə qazanmış “Neftçi” klubunun kollektivi ilə görüşmüşdür.
Səfir futbolçularımızı parlaq qələbə münasibətilə təbrik etmişdir. O demişdir ki, xüsusi əhəmiyyət daşıyan bu qələbə təkcə “Neftçi”nin deyil, bütün Azərbaycan xalqının, millətimizin qələbəsidir.
“Neftçi”nin prezidenti Rövnəq Abdullayev səfirliyə dəvətə görə R.Rizayevə minnətdarlığını bildirərək qeyd etmişdir ki, yanvarın 19-da keçirilən oyun “Neftçi” üçün imtahan olmuşdur. Taleyin hökmü ilə görüş 1990-cı ilin Qanlı 20 Yanvar faciəsi ilə eyni vaxta düşmüşdür. Bu səbəbdən “Neftçi”nin rəqiblərinə uduzmaq ixtiyarı yox idi. O, futbolçularımızın rəqiblə açıq mübarizədə daha güclü çıxmalarından və çox yüksək oyun nümayiş etdirmələrindən razı qaldığını diqqətə çatdıraraq demişdir: “Neftçi” inkişaf edərək, Azərbaycanın bayrağını daha da yüksəklərə qaldırmağa çalışacaqdır. Bizim hər bir qələbəmiz, bütün xalqımızın qələbəsidir”.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
