Nərimanov rayonunda 26 İyun – Silahlı Qüvvələr Günü münasibətilə tədbir keçirilmişdir
Bakı, 25 iyun (AZƏRTAC). Nərimanov Rayon İcra Hakimiyyətinin təşkilatçılığı ilə 26 İyun - Silahlı Qüvvələr Günü münasibətilə torpaqlarımızın ərazi bütövlüyü uğrunda döyüşlərdə iştirak etmiş Qarabağ müharibəsi əlilləri və veteranlarla görüş keçirilmişdir.
Rayon İcra Hakimiyyətindən AZƏRTAC-a bildirmişlər ki, əvvəlcə Vətən uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilmişdir.
Tədbirdə Nərimanov Rayon İcra Hakimiyyəti başçısının müavini İradə Mahmudova Ordumuzun şanlı tarixindən, müstəqil Azərbaycanın Silahlı Qüvvələrinin yaradılmasında xalqımızın ümummilli lideri Heydər Əliyevin misilsiz xidmətlərindən danışmışdır. Qeyd olunmuşdur ki, dahi rəhbərin ordu quruculuğu sahəsində həyata keçirdiyi işlərin Prezident, Ali Baş Komandan İlham Əliyev tərəfindən uğurla davam etdirilməsi nəticəsində Azərbaycan bu gün regionun ən güclü ordusuna sahibdir. Natiq Ordumuzun böyük quruculuq yolu keçərək peşəkarlığını artırdığını, maddi-texniki bazasını mütəmadi gücləndirərək mənfur düşməni hər an məhv edə biləcək hazırkı yüksək səviyyəyə çatdığını bildirmişdir.
Diqqətə çatdırılmışdır ki, müasir müstəqil dövlətimizin və Milli Ordumuzun qurucusu ulu öndər Heydər Əliyevin 1998-ci il mayın 22-də imzaladığı Fərmana əsasən, Əlahiddə Azərbaycan Korpusunun yarandığı gün - 26 iyun Azərbaycan Respublikasının Silahlı Qüvvələr Günü elan olunmuşdur. Hər il bu tarix rəsmi dövlət bayramı kimi qeyd edilir.
Qeyd edilmişdir ki, Ali Baş Komandan İlham Əliyev Ordumuzun qüdrətinin artırılmasını daim diqqət mərkəzində saxlayır. Dövlətimizin başçısının cəbhə bölgəsinə tez-tez səfər etməsi, hərbi hissələrdə əsgər və zabitlərlə səmimi görüşlər keçirməsi orduda yüksək əhval-ruhiyyə yaradır, qələbəyə yenilməz inamı möhkəmləndirir.
İ.Mahmudova Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin hərtərəfli dövlət qayğısı ilə əhatə olunduğunu vurğulamışdır. O, Azərbaycanın dinamik inkişafının və bu istiqamətdə dövlətimizin başçısının rəhbərliyi ilə aparılan geniş quruculuq işlərinin, köklü islahatların daha böyük nəticələrin əldə ediləcəyinə olan ümidləri daha da artırdığını söyləmişdir.
Tədbirdə iştirak edən Qarabağ müharibəsi əlilləri dövlətimizin onlara göstərdiyi diqqət və qayğıya görə dərin minnətdarlıqlarını bildirmişlər. Onlar işğal altındakı ərazilərimizin tezliklə yağı düşməndən azad ediləcəyinə, əzəli torpaqlarımızdan didərgin düşmüş həmvətənlərimizin öz ata-baba yurdlarına qayıdacaqlarına və ölkəmizin ərazi bütövlüyünün bərpa olunacağına əminliklərini ifadə etmişlər.
Sonda Nərimanov Rayon İcra Hakimiyyəti tərəfindən Qarabağ müharibəsi əlillərinə və veteranlara maddi yardım göstərilmişdir.
Bölmənin digər xəbərləri
