Nərimanov rayonunda Qanlı Yanvar faciəsi qurbanlarının xatirəsi anılmışdır
Bakı, 18 yanvar (AZƏRTAC). Yanvarın 18-də Nərimanov rayonundakı 45 saylı orta məktəbdə 20 Yanvar faciəsinin 23-cü ildönümü ilə bağlı anma mərasimi keçirilmişdir.
AZƏRTAC xəbər verir ki, Nərimanov Rayon İcra Hakimiyyətinin başçısı Abdin Fərzəliyev 20 Yanvar faciəsi haqqında məlumat vermişdir. Bildirilmişdir ki, 23 il əvvəl yanvarın 19-dan 20-nə keçən gecə sovet ordusunun zirehli texnikası və müasir silahlarla təchiz olunmuş əsgərləri dinc insanları - qocaları, gəncləri, qadınları və uşaqları qanlarına qəltan etmişlər.
Qeyd edilmişdir ki, 20 Yanvar faciəsi xalqımızın tarixinə qanla yazılmış səhifələrdən biridir. Amma o müdhiş gecə tariximizə təkcə faciə kimi yox, həm də Azərbaycan xalqının mübarizlik, dönməzlik, çağdaş milli-azadlıq hərəkatının qəhrəmanlıq səhifəsi kimi daxil olmuşdur. Həmin gün yüzlərlə qəhrəman oğul və qızlarımız təpədən-dırnağa qədər silahlanmış sovet ordusunun qarşısına əliyalın çıxmağa qadir olduğunu dünyaya sübut etmişdir.
Azərbaycan Prezidenti İlham Əliyev tərəfindən Qanlı Yanvar şəhidlərinin ailələrinə və əlillərinə daim diqqət və qayğı göstərilir.
Digər çıxış edənlər bildirmişlər ki, 1990-cı ilin Qanlı Yanvarında Azərbaycanın azadlığı və müstəqilliyi uğrunda şəhidlik zirvəsinə ucalmış Vətən övladları özlərinin fədakarlığı ilə xalqımızın qəhrəmanlıq salnaməsinə parlaq səhifə yazmışlar. Qanlı Yanvar faciəsi qurbanlarının xatirəsi xalqımızın qəlbində daim yaşayacaqdır.
Sonda şəhidlərə həsr olunmuş şeirlər söylənmiş, faciəni əks etdirən videoçarx nümayiş etdirilmişdir.
Bölmənin digər xəbərləri
