Nəsimi rayonunda dövlət qulluqçularının peşə bayramı qeyd edilmişdir
Bakı, 24 iyun (AZƏRTAC). Nəsimi Rayon İcra Hakimiyyətində (RİH) dövlət qulluqçularının peşə bayramı münasibətilə tədbir keçirilmişdir.
AZƏRTAC xəbər verir ki, rayon icra hakimiyyətinin başçısı Nəsib Məhəməliyev tədbiri açaraq dövlət qulluqçularını peşə bayramı münasibətilə təbrik etmiş, onlara uğurlar arzulamışdır. O bildirmişdir ki, Azərbaycanda dövlət qulluqçularının peşə bayramı günü Prezident İlham Əliyev tərəfindən təsis edilmişdir. Hər il bu bayram münasibətilə ölkəmizdə tədbirlər keçirilir. Ulu öndər Heydər Əliyevin əsasını qoyduğu ənənələr və dövlət qulluğu məsələləri ilə bağlı siyasət bu gün də uğurla davam etdirilir. Prezident İlham Əliyev dəfələrlə bildirmişdir ki, dövlət qulluqçuları dövlət və cəmiyyət qarşısında məsuliyyət daşıyırlar.
Rayon icra hakimiyyətinin şöbə müdiri Nazim Quliyev “Dövlət qulluğu haqqında” Qanun, onun ayrı-ayrı müddəaları və qanundan irəli gələn vəzifələr haqqında ətraflı məlumat vermişdir. Bildirilmişdir ki, 2000-ci il iyulun 21-də qəbul edilmiş qanun dövlət qulluqçularından fəaliyyətində insan hüquqlarını, demokratik prinsipləri, etik davranış qaydalarını rəhbər tutmağı, cəmiyyətin və dövlətin mənafeləri naminə vəzifə borcunu səmərəli şəkildə yerinə yetirməyi tələb edir.
Nəsimi Rayon İcra Hakimiyyətinin əməkdaşı Səbinə İlyasova dövlət qulluğu ilə bağlı qanun və hüquqi prinsiplərdən danışmışdır.
Nəsib Məhəməliyev toplantıya yekun vuraraq dövlət qulluğu sahəsində göstərdikləri səmərəli xidmətə görə rayon icra hakimiyyəti başçısının müavini Gülarə Verdiyevaya və Səbinə İlyasovaya fəxri fərmanlar təqdim etmişdir.
Bölmənin digər xəbərləri
