Bakı, 26 oktyabr, AZƏRTAC

Sağlam Ailə Tibb Mərkəzinin icraçı direktoru Nigar Rüstəmli AZƏRTAC-a müsahibəsində tibbi marketinq, idarəetmənin əsasları, çalışdığı müəssisənin iş prinsipi haqqında danışıb. Müsahibəni təqdim edirik:

- İstərdik ənənəvi sualdan başlayaq. Tibbi marketinq sahəsinə necə gəldiniz və niyə məhz bu sahəni seçdiniz ?

- Tibbi marketinq sahəsinə gəlməyim təsadüfən olub. Təhsilimin tibb sahəsi ilə əlaqəsi yoxdur. Sağlam Ailə Tibb Mərkəzində ilk dəfə Qeydiyyat şöbəsində fəaliyyətə başlamışam. Bu şöbə müəssisənin mətbəxi hesab edilir və bütün proseslər burada gedir. Həmin vaxtlar tibbi marketinqin ənənəvi marketinqdən fərqli bir istiqamət olacağını düşünürdüm. Bəlkə də, gənclər sektorundan gəlməyim ilə əlaqədar idi ki, mənim üçün marketinq insanlarla ünsiyyət, insanlara nəyisə çatdırmaq və maarifləndirmək demək idi. Bir insandan nəyisə tələb etməmişdən öncə onu öyrətməlisən. Bu işdə də, ailədə də, övlad tərbiyəsində də belədir. İnsanlar daha çox tibb ilə bağlı məsələlərdə məlumatsızlıqdan əziyyət çəkirlər. Bəzən müəyyən bir xəstəliklə bağlı hansı həkimə müraciət etməli olduqlarını belə bilmirlər. Hələ Qeydiyyat şöbəsində çalışarkən Sağlam Ailə Tibb Mərkəzinin ideologiyasından yola çıxaraq bu sahənin inkişafı istiqamətində təşəbbüs irəli sürdüm.

- Sağlam Ailə Tibb Mərkəzi bir markaya çevrilərkən hansı mərhələləri keçdi?

- Sağlam Ailə Tibb Mərkəzinin fəlsəfəsi digərlərindən fərqlidir. Belə ki, ailə planlama, ailə sağlamlıq mərkəzləri ailə qurduqdan sonrakı proseslər üçün nəzərdə tutulub. “Sağlam Ailə”nin ideologiyası isə sağlam olduqdan sonra ailə qurmağa istiqamətlənib. Biz bu gün bu ideologiyanı təbliğ etməklə özümüzü yox, cəmiyyəti faydalandırırıq və sağaldırıq. Bu illər ərzində bu istiqamətdə müxtəlif sosial layihələr həyata keçirmişik. Nəticə isə hər zaman gözləntilərimizin üstündə olub.

Marketinq bilavasitə insanların güvəni ilə əlaqədardır. Tibdə isə digər sahələrdən fərqli olaraq güvən, etibar və inam önəmli nüansdır. Biz nəyisə etməmişdən əvvəl araşdırma aparırıq. Tibbi marketinq daha çox duyğu, tövsiyə, güvən üzərində qurulub. Markalara güvən olmadığı üçün daha çox fərdlərə güvən yaranır. “Sağlam Ailə” olaraq biz bu stereotipi qırmağa çalışdıq. Əgər bizim markanı insan olaraq düşünsək, mən “Sağlam Ailə”ni kişi obrazında görürəm. Öz sözünü deyən, eyni zamanda ciddi, konservativ qaydaları olan və hər zaman verdiyi sözün arxasında duran bir kişi xarakterində.

- Digər sahələrin marketinqindən fərqli olaraq tibbi marketinqin hansı xüsusiyyətləri və incəlikləri var?

- Hansısa bir məhsulu alanda ondan razı qalmırıqsa onu qaytara bilirik. Ancaq bunu insan həyatı və sağlamlığına aid edə bilmərik. Psixoloji olaraq hansısa bir yeri ağrıyan insana nəyisə təbliğ etmək daha çətindir. Bu halda empati qurmaq və hər kəsi öz doğmanızın yerinə qoyub xidmət göstərmək lazımdır. Bu zaman göstərilən xidmətdən məmnun qalan şəxs bu məmnuniyyətdən ətrafındakıları da məlumatlandıracaq. Təbii ki, hər şey məmnuniyyətlə yekunlaşmır. Keyfiyyətli xidmətin arxasında görünməyən güc dayanır. Bu da “Sağlam Ailə”nin tibbi heyəti və laborator keyfiyyətidir ki, bunu da standartlar tənzimləyir. Bizim işimiz xidmətə fokuslandığı üçün hər kəsə eyni dərəcədə yanaşılır və eyni xidmət göstərilir.

- Öz sahəsində ön sıralarda olan “Sağlam Ailə”nin iş mexanizmi nəyə əsaslanır?

- İki şəxs ona verilən tapşırığı yerinə yetirərkən eyni nəticəyə müxtəlif formada çata bilər. Nəticədə isə xaos yaranar. Tibdə isə bu yolverilməzdir. Tibbin müəyyən standartları var: dövlətin qoyduğu standartlar və şirkətin özünü təkmilləşdirmək üçün aldığı ekstra standartlar. Müəssisə olaraq biz “sıfır xəta” prinsipi ilə, insana əsaslanan deyil, sistemə əsaslanan iş prosesi qurmuşuq. Və həmin sistem saat mexanizmi ilə fərdlərdən asılı olmayaraq işləyir. Bu sistemdə insanların yerini dəyişsən belə, sistem pozulmur. Hər kəs mövcud qaydalara, prosedurlara və təlimatlara tabedir.

Ümumiyyətlə qeyd etmək istəyirəm ki, biz ilkləri sevirik. Sağlam Ailə Tibb Mərkəzi Azərbaycanda TÜRKAK akkreditasiyalı ilk tibbi laboratoriyadır, ilk Keyfiyyətə Nəzarət Sertifikatını, ilk Müştəri Məmnuniyyəti və Şikayətlərinin idarə edilməsi standartını biz qazanmışıq. Daha sonra ölkəmizdə bu bir trend halına gəldi.

- Uzun illərdir Sağlam Ailə Tibb Mərkəzinin icraçı direktoru vəzifəsində çalışırsınız. İdarəetmənin əsasları mövzusuna toxunaraq soruşmaq istərdik ki, bu işi uğurla icra etmək üçün mütəxəssis hansı xüsusiyyətlərə malik olmalıdır və nəyi bilməlidir?

- Sağlam Ailə Tibb Mərkəzində icraçı direktor vəzifəsində artıq 4 ildir fəaliyyət göstərirəm. Bu illər ərzində müəssisə daxilində bir neçə vəzifədə çalışmışam. Hesab edirəm ki, bu bir uğur hekayəsidir. Bəzən gənclər düşünür ki, bir müəssisədə inkişaf etmək üçün kənar qüvvələrin təsirinə ehtiyac var. Mən burada Qeydiyyat şöbəsində fəaliyyətə başlamışam. Daha sonra öz təşəbbüskarlığım və mənə yaradılan şəraitdən doğru istifadə edərək addımlamışam. Bu müddət ərzində mərkəzin İctimaiyyətlə əlaqələr şöbəsini yaratdım. Bir çox vəzifələrdə çalışdığım üçün icraçı direktor olaraq bu iş mənə çətin deyil. Uzun müddət eyni müəssisədə çalışmanın avantajı ondan ibarətdir ki, artıq şirkətin nəbzini tutursan və ruhunu bilirsən. Bunu bildiyin üçün də qərar vermək rahat olur.

Gənclərə tövsiyəm odur ki, çalışdıqları şirkətdə uğurlu olmaq istəyirlərsə, onu əlifbasından bilsinlər. İdarəetmədə qızıl ortanı tapmaq vacibdir. Əgər bu gün bu müəssisədə istər iş təcrübəsinə, istər yaş təcrübəsinə görə məndən böyük olanlar mənimlə razılaşırlarsa, bu yaratdığım güvənin təcəssümüdür.

- Bəzən insan istər şəxsi həyatında, istərsə də karyerasında nə istədiyini anlamaqda çətinlik çəkir. Yəqin ki, zəngin təcrübənizdə bu hallarla qarşılaşmısınız. Bununla əlaqədar insanlara hansı tövsiyələriniz var?

- Mən öncə hər şeyə görə, hətta ən xırda uğuruma görə özümə təşəkkür edirəm. Çünki mən bunu özümə etmədiyim təqdirdə özümü fərd olaraq qəbul etməmiş oluram. Bəzən insanlar tək olmaqdan qorxurlar. Əlaqələrimin geniş olmağına baxmayaraq bir çox qərarları verərkən özümlə olmağı üstün tuturam. Bu halda daha doğru qərar verəcəyimi düşünürəm. İnsan özünə sual verməlidir: “Mən özümü harada xoşbəxt və faydalı hesab edirəm? “Mən çox pul qazanmaq istəyirəm yoxsa mən faydalı olmaq istəyirəm?” Yoxsa sadəcə özümü düşünürəm. Təbii ki, hər biri ayrı-ayrılıqda önəmlidir. Məndə maddiyyatdan öncə öyrənmək istəyi var idi. Hətta özümə aid olmayan işləri də öyrənmək və faydalı olmaq istəyirdim. İlk təhsilim ibtidai təhsilin metodikası olsa da, mən özümü insanlarla ünsiyyətdə olan zaman daha xoşbəxt hiss edirdim. Bir aforizmdə deyilir ki: “Peşəni və həyat yoldaşını seçərkən diqqətli olmalısan. Çünki ömrünün sonuna qədər səninlə birlikdədirlər”. İnsan elə bir varlıqdır ki, özü xoşbəxt olarsa, ətrafını da xoşbəxt edər.

- Siz nüfuzlu forum və konfransların spikeri olaraq geniş auditoriya qarşısında çıxış edirsiniz. Çalışdığınız sahədə topladığınız zəngin təcrübənizi bölüşməyiniz forum iştirakçıları üçün çox faydalı olur. Onları daha çox maraqlandıran mövzular hansılardır?

- Auditoriya qarşısında çıxış etmək sevdiyim işlərdən biridir. Bu zaman qarşımdakı insanlarla enerji mübadiləsinə önəm verirəm. Bir neçə il öncəyə qədər gənclərin tibbi maariflənməsi mövzusu auditoriyanın daha çox maraq dairəsində idi. Amma son illərdə yəqin ki, bu mənim iş həyatımda olan dəyişikliklərlə əlaqədardır ki, məhz idarəetmə ilə bağlı layihələrdə spiker oluram. Son bir neçə tədbirimiz gənc qadınların motivasiyası mövzusunda olub. Xanımların cəmiyyətə inteqrasiyası, cəmiyyətdə nüfuz və söz sahibi olması aktual mövzudur. Burada tələbat faktoru önəmli rol oynayır. Tədbir sonrası xüsusilə gənc xanımlardan çoxsaylı geri dönüşlər alıram.

- Siz eyni zamanda sosial media hesablarınızda sağlam həyat tərzi mövzularına toxunub maarifləndirici məlumatlar paylaşırsınız. Bu gün bu mövzu çox aktualdır, çünki hər kəs sağlam həyat tərzi yaşamaq istəyir. Sizcə sağlam həyat tərzi üçün ilk addım nə olmalıdır? Hansı qaydalara riayət etmək lazımdır?

- Mən hər şeyi sıfırdan başlamağı sevirəm. Özümün sevmədiyim, özümə tətbiq etmədiyim, qəbul etmədiyim heç nəyi heç kəsə tövsiyə etmirəm. Mənə hər hansı bir layihə təklif edildikdə belə birinci onu qəbul edib, inanıram, inandıqdan sonra isə inandırmağa başlayıram. Bu mənim yanaşma tərzimdir. Sağlam həyat tərzinə gəldikdə isə mən uşaqlıqdan artıq çəkili və bu halımla xoşbəxt olan biri olmuşam. Lakin günlərin bir günü sevdiyim bir geyimin məni narahat etdiyini hiss etdim. Həmin an başa düşdüm ki, iradəmə sahib çıxmalıyam. Beləliklə, idman etməyə başladım, idmanı sevdim və həyat tərzimə çevirdim. Sevərkən də ətrafımdakılara sevdirdim. Ətrafımdakı bir çox insan mənim paylaşımlarımdan ilhamlanıb sağlam həyat tərzinə keçdi. İnsanlara motivasiya verdiyim üçün xoşbəxtəm.