Nizami Gəncəvi Beynəlxalq Mərkəzi Andorrada toplantı keçirəcəkdir
Bakı, 11 iyun (AZƏRTAC). Bu ilin sentyabrında Andorra Knyazlığında Nizami Gəncəvi Beynəlxalq Mərkəzinin III ali səviyyəli görüşü və Mərkəzin idarə heyətinin VII beynəlxalq toplantısı keçiriləcəkdir. Bu barədə razılıq Nizami Gəncəvi Beynəlxalq Mərkəzinin icraçı direktoru Rövşən Muradovun Andorranın sabiq Baş naziri Oskar Ribas Reyq ilə görüşündə əldə olunmuşdur.
Diasporla İş üzrə Dövlət Komitəsindən AZƏRTAC-a bildirilmişdir ki, toplantıda Nizami Gəncəvi Beynəlxalq Mərkəzi idarə heyətinin üzvləri - Vayra Vike-Frayberqa, İsmail Serageldin, Tarya Halonen, Emil Konstantinesku, Petar Stoyanov, Stepan Mesiç, Boris Tadiç və başqalarının iştirakı nəzərdə tutulmuşdur.
Toplantıda əsas müzakirə mövzusu münaqişələr və onların həlli yolları, eləcə də Mərkəzin gələcək fəaliyyət istiqamətləri olacaqdır.
Xatırladaq ki, Nizami Gəncəvi Beynəlxalq Mərkəzinin ilk ali səviyyəli toplantısı 2013-cü ilin sentyabrında Bakıda, ikinci görüş isə bu ilin fevralında Afinada keçirilmişdir.
Bölmənin digər xəbərləri
