“Novavax” kompaniyası hazırladığı vaksinin 90 faiz effektiv olduğunu bildirib
Bakı, 14 iyun, AZƏRTAC
ABŞ-ın “Novavax” kompaniyası tərəfindən hazırlanan COVID-19 əleyhinə vaksin Amerika və Meksikada aparılan miqyaslı sınaqların gedişində həm bu virusa, həm də onun müxtəlif ştammlarına qarşı 90 faiz effektivlik göstərib.
AZƏRTAC Associated Press agentliyinə istinadla xəbər verir ki, vaksin əsasən koronavirusun ABŞ ərazisində dominantlıq edən “Britaniya” ştammına qarşı təsirli olub.
Eyni zamanda vaksinasiyadan sonra iynənin vurulduğu yerdə ağrılar və zəiflik kimi yan təsirlər müşahidə edilib. “Novavax” kompaniyasının icraçı direktoru Stenli Erik peyvənddən sonra trombun əmələ gəlməsi barədə məlumatın olmadığını bildirib.
Kompaniya sentyabrın sonunadək ABŞ və Avropada preparatın istifadəsinə icazə almaq niyyətindədir. “Novavax” o vaxta qədər ayda 100 milyon vaksin dozası istehsal etməyi, dekabr ayınadək isə bu göstəricini 150 milyona çatdırmağı planlaşdırır. Kompaniya, eyni zamanda, 2022-ci ildə ABŞ-a 110 milyon, inkişaf etməkdə olan ölkələrə isə 1,1 milyard vaksin dozası çatdırmağı vəd edib.
Agentliyin məlumatına əsasən, “Novavax” peyvəndinin saxlanması və daşınması çox asandır: o, adi soyuducuda saxlanıla bilər. Preparatın inkişaf etməkdə olan ölkələrdə əhalinin immunlaşdırılmasında ciddi rol oynayacağı gözlənilir.
Qeyd edək ki, Vaksinasiya və İmmunlaşdırma üzrə Qlobal Alyans (GAVI) 350 min “Novavax” vaksininin alınması və cari ilin üçüncü rübündə çatdırılmaların başlanması üçün müqavilə imzalayıb.
Bölmənin digər xəbərləri
